ᐃᓄᐃᑦ ᐱᐅᓯᖓ ᐱᒻᒪᕆᐅᔪᖅ ᑐᓐᖓᓱᒃᑎᑦᑎᕙᒃᓗᓂ ᐊᒻᒪᓗ ᐅᐱᒍᓱᖕᓂᖅ ᑕᐃᒫᒃ ᑐᓐᖓᓱᒃᑎᑦᑎᓗᑎᒃᓗ ᓄᓇᖃᑎᒋᓐᖏᑕᒥᖕᓂᒃ ᐊᖏᕐᕋᒥᖕᓄᑦ ᐊᒻᒪᓗ ᓂᕆᑎᑦᑎᓲᑦ ᐅᕝᕙᓘᓐᓃᑦ ᖃᓄᑐᐃᓐᓇᖅ ᐃᑲᔪᖅᖢᒋᑦ ᐳᓛᑦᑐᑦ ᐱᔪᒪᔭᖏᓐᓂᒃ. ᐃᒻᒪᑲᓪᓚᖕᓂᑦ ᐅᓇ ᐱᐅᓯᑐᖃᖅ ᐊᑑᑎᖃᖅᑐᖅ ᑐᓐᖓᓱᒃᑎᑦᑎᓂᖅ ᑕᐃᒪᓗ ᐃᓄᐃᑦ ᑎᑭᖃᑦᑕᕐᒪᑕ ᐊᓯᒥᖕᓂᑦ ᓄᓇᓕᕋᓛᓂᑦ, ᑕᐃᒪᓗ ᑭᓯᐊᓂ ᐊᔪᓕᕋᒥᒃ ᐃᑲᔪᖅᑕᐅᔭᖅᑐᖅᑐᓂᒃ. ᑐᓐᖓᓇᕐᓂᖅ ᐊᑕᑦᑎᐊᕐᒥᔪᖅ ᐊᖏᓂᖅᓴᒧᑦ ᐱᐅᓯᑐᖃᕐᓄᑦ ᖃᓄᐃᓕᐅᕈᑎᒃᓴᐅᔪᓄᑦ ᐃᓄᐃᑦ ᖃᐅᔨᒪᔭᑐᖃᖏᓐᓂ ᐅᑯᐊᓗ ᐃᑲᔪᖅᑐᐃᔫᑦ ᓴᕿᑦᑎᓯᒪᔭᕆᐊᖃᕐᓂᕐᒧᑦ ᐃᓚᒌᒍᓯᕐᒥᒃ ᐊᒻᒪᓗ ᓄᓇᓖᑦ ᐸᕿᖃᑎᒌᒋᐊᖃᕐᓂᖏᓐᓄᑦ ᐊᑐᓂ. ᑕᐃᒪᓗ, ᑐᓐᖓᓇᕐᓂᖅ ᐃᑲᔫᑎ ᓄᓇᓕᖕᓂ ᖃᓄᐃᖏᑦᑎᐊᕐᑎᑦᑎᓂᕐᒧᑦ ᐊᑦᑕᕐᓇᖅᑐᖃᓐᖏᑦᑐᒦᓐᓂᐊᕐᒪᑕ ᑕᐃᑲᓂ ᐃᓄᐃᑦ ᐃᒃᐱᒍᓱᑦᑎᐊᕐᓗᑎᒃ ᐃᓗᐊᕆᔭᒥᖕᓃᒃᑲᒥᒃ ᐃᑲᔪᖅᑕᐅᔪᒪᓕᕈᑎᒃ ᐊᒻᒪᓗ ᐋᕿᒃᓯᔾᔪᑕᐅᓲᖅ ᑐᑭᖃᖅᑐᒥᒃ ᐃᓚᒌᒍᓯᖅ. ᑐᓐᖓᓇᕐᓂᖅ ᑕᑯᔭᐅᔪᓐᓇᖅᑐᖅ ᐱᒋᐊᕈᑎᒋᓗᒍ ᐃᓚᒌᑦᑎᐊᕈᓯᕐᒧᑦ ᐊᓯᒥᖕᓄᑦ ᐊᒻᒪᓗ ᐊᑑᑎᖃᖅᑐᖅ ᐃᑲᔪᕈᕕᑦ ᐃᑲᔪᖅᑕᐅᔪᒫᕐᒥᔪᑎᑦ.
ᑕᑯᓐᓇᕈᕕᒋᑦ ᐊᔾᔨᖑᐊᑦ, ᖃᐅᔨᓂᐊᖅᑐᑎᑦ ᐊᔾᔨᓕᐊᖏᑦ ᐃᓪᓚᐅᑉ ᓄᓇᖓᓂ ᐳᓛᖅᑐᓂᒃ, ᐊᒻᒪᓗ ᐊᔾᔨᓕᐊᖏᑦ ᐃᓚᐅᑦ ᐃᒻᒥᓂᒃ ᑐᓐᖓᓱᒃᑎᑕᐅᒐᒥ ᐃᓅᖃᑎᒥᓂᑦ ᓄᓇᖃᑎᒋᓐᖏᑕᒥᓂᑦ ᑕᐃᑲᓂ ᑲᓛᑦᖡᑦ ᓄᓇᖓᓃᒃᑲᒥ (N-1979-051-2139). ᐊᔾᔨᖑᐊᑦ ᐅᑯᐊ N-1979-051: 2014, ᑕᑯᑎᑦᑎᔪᑦ ᐃᓪᓚᐅᑉ ᓄᓕᐊᖓ ᑭᓪᓚᒃ ᑕᑯᓐᓇᖅᑐᖅ ᖃᓪᓗᓈᓂᒃ ᑎᑭᓯᒪᔪᓂᒃ ᐃᓚᖓᑦ ᒪᔾᔭᒐᓱᒃᑐᖅ ᕿᓯᖕᒥᒃ, ᑕᑯᑎᑦᑎᔪᖅ ᐱᐅᓯᑐᖃᖃᑎᒌᓐᖏᑦᑐᑦ ᐊᔪᖏᑦᑐᑦᑕᐅᖅ ᐃᓄᐃᑦ ᓄᓇᓕᖕᓂ ᐊᑐᖅᑕᐅᓗᑎᒃ ᓴᓇᓕᔾᔪᓯᖏᑦ ᐊᒻᒪᓗ ᖃᐃᖁᓪᓗᒍ ᖃᓪᓗᓈᑦ ᐃᓕᑦᑎᓗᑎᒃᑕᐅᖅ ᐃᒻᒥᖕᓂᑦ. ᐊᓯᖏᑦ ᐊᔾᔩᑦ ᓲᕐᓗ N-1979-051: 1909 ᑭᓪᓚᖅ, ᓕᐊ, ᐊᒻᒪᓗ ᐊᑎᖃᖏᑦᑐᑦ ᖃᓪᓗᓈᑦ ᑕᑯᒃᓴᐅᑎᑦᑎᔪᑦ ᐃᓕᖅᑯᓯᑐᖃᕐᓂᒃ ᑕᐅᖅᓰᖃᑎᖃᕐᓂᕐᒥᒃ ᐃᓄᐃᑦ ᐊᕐᓇᐃᑦ ᐊᑐᖃᑦᑕᕐᓂᖏᓐᓄᑦ ᖃᓪᓗᓈᑦ ᐊᓐᓄᕌᖏᓐᓂᒃ ᐊᒻᒪᓗ ᖃᓪᓗᓈᓂᒃ ᐊᑐᖅᑐᑎᒃ ᐃᓄᐃᑦ ᐊᓐᓄᕌᖏᓐᓂᒃ.
ᐅᓪᓗᒥ ᐃᓄᐃᑦ ᑲᔪᓯᔪᒥᒃ ᐅᐱᒍᓱᒃᑐᑦ ᐃᒻᒥᖕᓂᒃ ᑐᓐᖓᓱᒃᑎᑦᑎᔪᓐᓇᕋᒥᒃ ᑎᑭᓵᖅᑐᓂᒃ, ᐊᒻᒪᓗ ᐊᑐᖅᑕᐅᒐᔪᓛᖅ ᑏᑐᖅᑎᓪᖢᒋᑦ ᑳᐱᑐᖅᑎᓪᖢᒋᑦ ᐅᕝᕙᓘᓐᓃᑦ ᓂᕆᖃᑎᒋᓪᓗᒋᑦ. ᑕᐃᒪᐃᓪᖢᓂ ᓴᐃᓕᑦᑎᐊᕐᓇᑐᒥᒃ ᐊᕙᑎᖃᖅᑐᑦ ᑕᐃᒪᓗ ᐅᓂᒃᑳᖃᓂᒌᓕᓲᑦ, ᐃᒡᓚᒪᔭᒃᖢᑎᒃ,ᐊᒻᒪᓗ ᐃᒻᒥᖕᓄᑦ ᐃᓅᖃᑎᒌᑦᑎᐊᕐᓂᐊᕋᒥᒃ ᑕᒪᕐᒥᑦᑎᐊᖅᑐᖅ ᑭᒃᑯᑐᐃᓐᓇᐃᑦ. ᐅᓇ ᐊᑑᑎᖃᖅᑐᖅ ᑐᓐᖓᓇᕐᓂᖅ ᐊᕙᑖᓂᑦ ᐃᓄᐃᑦ ᒪᒃᑯᒃᑐᑦ ᐊᑐᖅᑕᐅᓲᖑᖕᒥᔪᖅ ᐃᓄᒃᑎᑐᑦ/ᖃᓪᓗᓈᑎᑐᑦ ᑕᐃᒎᓯᖅ “ᑐᓐᖓᓱᒋᑦ(ᓯ), ᐊᓕᖅᓰᕐᓗᓯ,” ᐊᑐᖅᑕᐅᓲᖅ ᑐᓐᖓᓱᒃᑎᑦᑎᓗᐊᒧᑦ “ᑐᓐᖓᓱᑦᑎᐊᕆᑦ” ᐊᓕᖅᓰᕐᓗᑎᑦ. ᐅᓇᓗ ᐊᓕᖅᓰᖅᑎᑦᑎᓇᓱᓐᖏᑦᑐᖅ ᑭᓯᐊᓂ ᑐᑭᓯᔭᐅᓂᐊᕋᒥ ᐊᖏᕐᕋᖅᓯᒪᑦᑎᐊᕐᓕ ᐊᖏᕋᖓᓂ ᐊᒻᒪᓗ ᐃᓗᐊᕆᔭᒥᓂᒃ ᐊᑐᕐᓗᓂ. ᑕᐃᒪᓐᓇᐅᒐᓗᐊᖅᑎᓪᓗᒍ, ᐊᑐᖅᑕᐅᓲᖅ ᑐᓐᖓᓇᕐᓂᖅ ᐱᑦᑎᐊᓕᓇᓱᓲᖑᓕᖅᑐᑦ ᑐᓂᖓᓱᒃᑎᑦᑎᓂᖓ ᐃᓄᐃᑦ ᐱᑦᑎᐊᖅᑕᐅᓯᒪᓐᖏᓐᓇᒥᒃ ᐊᓯᒥᖕᓂᑦ ᐊᒻᒪᓗ ᖃᓪᓗᓈᑦ ᐊᓯᐅᑎᑦᑎᕙᓪᓕᐊᓂᖏᓐᓂᒃ ᐃᓄᐃᑦ ᐅᖃᐅᓯᖏᓐᓂᒃ. ᐳᓛᖅᑐᑦ ᑕᑯᑎᑦᑎᔭᕆᐊᖃᖅᑐᑦ ᐱᑦᑎᐊᕐᓗᑎᒃ ᐊᒻᒪᓗ ᐃᒃᐱᒍᓱᑦᑎᐊᕐᓗᑎᒃ ᐃᓄᖕᓂᑦ ᑕᐃᒫᑦ ᐃᓕᑦᑎᐊᕋᓱᒃᓗᒋᑦ ᐃᓄᐃᑦ ᐊᒻᒪᓗ ᐃᓚᒌᑦᑎᐊᕐᓗᑎᒃ, ᑐᓴᕐᕕᐅᓇᓱᑐᐃᓐᓇᖃᑦᑕᓐᖏᓪᓗᑎᒃ ᐅᕝᕙᓘᓐᓃᑦ ᐊᑐᖅᑕᐅᑐᐃᓐᓇᓐᖏᓪᓗᑎᒃ ᐃᓄᐃᑦ ᑕᒪᐅᓐᓇ ᑐᓐᖓᓇᖕᓂᖓᒍᑦ.