ᑭᐅᓗ ᐸᐃᓐ ᐊᒻᒪᓗ ᐃᕚᓐᔨᓖᓐ ᒫᓐ
ᔫᓯᐱ ᐃᓪᓚᐅᑦ ᐃᒃᐱᒋᔭᐅᑦᑎᐊᖅᑐᖅ ᐃᓕᕋᒋᔭᐅᕗᖅ ᑖᓐᓇ ᐃᓄᒃ ᐊᖑᓇᓱᒃᑎᑦ ᐊᓯᕙᖅᑎ ᐊᒻᒪᓗ ᓯᕗᓕᐅᖅᑎ. ᐅᓇ ᓴᕿᔮᖅᑎᑦᑎᔪᖅ ᑕᑯᔭᒐᒃᓴᓂᒃ, ᐅᓇᑦᑕᐅᖅ ᐊᔪᖏᑦᑎᐊᓚᐅᖅᑐᖅ ᐊᔾᔨᓕᐅᕈᑎᓂᒃ ᐊᑐᕈᓐᓇᖅᖢᓂ.
ᔫᓯᐱ ᐃᓪᓚᐅᑦ ᐃᒃᐱᒋᔭᐅᑦᑎᐊᖅᑐᖅ ᐃᓕᕋᒋᔭᐅᕗᖅ ᑖᓐᓇ ᐃᓄᒃ ᐊᖑᓇᓱᒃᑎᑦ ᐊᓯᕙᖅᑎ ᐊᒻᒪᓗ ᓯᕗᓕᐅᖅᑎ. ᐅᓇ ᓴᕿᔮᖅᑎᑦᑎᔪᖅ ᑕᑯᔭᒐᒃᓴᓂᒃ, ᐅᓇᑦᑕᐅᖅ ᐊᔪᖏᑦᑎᐊᓚᐅᖅᑐᖅ ᐊᔾᔨᓕᐅᕈᑎᓂᒃ ᐊᑐᕈᓐᓇᖅᖢᓂ.
ᐃᓪᓚᐅᑦ ᐃᓅᓚᐅᖅᓯᒪᔪᖅ ᖃᓂᒋᔭᖓᓂ ᒥᑦᑎᒪᑕᓕᒃ, ᑕᐃᑲᓂ ᓄᓇᕗᒻᒥ, ᐃᒻᒪᖄ ᑕᒫᓂ 1911 ᐅᕝᕙᓗᑭᐊᖅ 1912. ᐊᓈᓇᖓ ᐊᕐᓇᐅᔭᖅ ᐊᒻᒪᓗ ᐊᑖᑕᖓ ᐊᑯᒪᓕᒃ. ᐊᑯᒪᓕᒃ ᐊᓯᕙᒃᑲᒻᒪᕆᐋᓘᓚᐅᖅᓯᒪᔪᖅ ᐊᖑᓇᓱᒃᑲᒻᒪᕆᐋᓘᓚᐅᖅᑐᖅ ᐊᒻᒪᓗ ᐊᔪᕆᖅᓲᔨᐅᓪᓗᓂ ᐊᖕᓕᑲᓐ ᑐᒃᓯᐊᕐᕕᖓᓂ. ᐃᓪᓚᐅᑦ ᓄᓕᐊᖃᓚᐅᖅᑐᖅ ᐊᑎᖃᖅᑐᖅ ᕿᓪᓗᖅ, ᐊᒻᒪᓗ ᖁᓕᐅᓐᖏᖔᖅᑐᓂᒃ (9) ᑭᑐᕐᖓᖃᖅᖢᑎᒃ: ᐹᓪ ᐅᓪᓕᑎᑕᖅ, ᐅᓖᐱᑲ, ᐸᓂᓗᒃ, ᓕᐊ, ᒨᓯᔅ (ᐅᕝᕙᓗᑭᐊᖅ ᒨᓯᓯ), ᐸᐅᓗᓯ, ᓄᐊ (ᑕᐃᔭᐅᖃᑦᑕᓚᐅᖅᓯᒪᖕᒥᔪᖅ ᓄᐊᑲᓪᓚᒃ), ᐅᓘᑎ ᐊᒻᒪᓗ ᓲᓴᓐ. ᐃᓪᓚᐅᖅ ᐊᖑᓇᓱᒍᓐᓇᖅᓯᓚᐅᖅᓯᒪᔪᖅ ᐃᓕᑦᑎᓪᓗᓂ ᐊᑖᑕᒥᓂᑦ, ᐊᑯᒪᓕᑦ, ᐊᒻᒪᓗ ᖄᖏᖅᖢᒍ ᐊᑖᑕᓂ ᓯᕗᓕᐅᖅᑎᖑᖅᖢᓂ ᓄᓇᒥᖕᓄᑦ, ᑕᐃᑲᓂ ᐊᑦᓘᑦᓯᕕᒃ, ᑰᓕ ᕿᑭᖅᑕᒥ ᑕᒫᓐᓃᑦᑐᖅ ᑕᓯᐅᔭᖅ, ᐅᑯᐊᓗ ᖃᓂᒋᔮᓂ 50 ᑭᓚᒦᑕᔅ ᐱᓇᖕᓇᖓᓂᑦ ᒥᑦᑎᒪᑕᓕᒃ ᐊᒻᒪᓗ ᖃᓂᒋᔮᓂ 30-ᓂᑦ ᐃᓄᖃᖅᑐᖅ. ᓄᑲᑉᐱᐊᖑᓪᓗᓂ, ᐃᓪᓚᐅᑦ ᐃᓕᑦᑎᓚᐅᖅᓯᒪᖕᒥᔪᖅ ᐊᑖᑕᒥᓂᑦ, ᐊᒻᒪᓗ ᐊᓯᖏᓐᓂᑦ ᑐᓄᓂᕐᒥᐅᓂᑦ, ᖃᓄᖅ ᐊᔪᕆᖅᓲᔾᔨᖃᑦᑕᓚᐅᖅᑐᖅ ᓇᐅᒃᑰᕆᐊᖃᕐᓂᖏᓐᓂᒃ ᑲᓪᓗᓈᑦ - ᖃᓪᓗᓈᑦ - ᐱᓕᕆᔪᓐᓇᑦᑎᐊᖅᖢᒋᑦ. ᑕᒪᕐᒥᒃ ᐃᓪᓚᐅᑦ ᐊᒻᒪᓗ ᐊᑯᒪᓕᒃ ᐊᑯᓚᐃᑦᑐᒥᒃ ᑕᐅᖅᓰᔭᖅᑐᖅᐸᓚᐅᖅᑐᑦ ᐊᒻᒪᓗ ᐃᓛᓐᓂᒃᑯᑦ ᐃᖅᑲᓇᐃᔭᖅᐸᒃᖢᑎᒃ ᕼᑦᓴᓐ ᐸᐃ ᑲᒻᐸᓂᒃᑯᓄᑦ (ᓂᐅᕕᖅᑎᒃᑯᑦ). ᑕᐃᒪᓐᓇᐅᒐᓗᐊᖅᑎᓪᓗᒍ ᐊᒥᕐᓂᒃ ᕿᓯᖕᓂᒃ ᓂᖏᐅᑎᑦ ᓄᖑᓯᒪᓕᖅᑐᑦ ᑎᑭᐅᑎᓚᐅᖅᑎᓐᓇᒍ 1940ᓂ, ᓂᐅᕕᖅᑎᒃᑯᑦ ᑎᑎᕋᖁᑎᖃᖅᑐᑦ ᐅᖃᖅᓯᒪᔪᖅ ᑖᓐᓇ ᐃᓪᓚᐅᑦ ᐃᓚᒋᔭᐅᓚᐅᖅᑐᖅ ᐊᖑᓇᓱᒃᑲᒻᒪᕆᐋᓗᖃᑕᐅᓪᓗᓂ ᑕᐅᖅᓰᕕᐅᖃᑦᑕᖅᑐᒥ ᓄᓇᖃᖅᑐᓂ. ᑕᐃᑲᓂ ᒪᐃ 1946, ᑎᑎᕋᖅᑕᐅᓯᒪᓚᐅᕐᒥᔪᖅ ᐊᖏᓂᖅᐹᓂᒃ ᐅᓄᓛᓂᒃ ᖀᔭᕋᑦᑕᖅᓯᕙᒃᑐᖅ ᓄᓇᖓᓐᓂ ᑕᐃᒫᒃ 103 ᑎᕆᒐᓂᐊᑦ.
ᔪᓯᐱ ᐃᓪᓚᐅᑦ ᐊᔾᔨᓕᐅᕆᖃᑦᑕᓚᐅᖅᑐᖅ ᐊᒥᓱᓂᒃ ᑕᕐᕆᔭᐅᓯᐊᑎᒍᑦ ᐊᒻᒪᓗ ᐊᔾᔨᓕᐅᕈᑎᑦᑎᒍᑦ. ᐱᒋᐊᓚᐅᖅᓯᒪᔪᖅ 1952 ᑲᓇᑕᒥ ᑕᕐᕆᔭᐅᓯᐅᖅᑏᑦ ᑲᑎᒪᔨᖏᑦ ᐊᑎᖃᖅᑐᖅᓄᓇᖓᑦ ᐅᓪᓗᖅᑐᔪᖅ, ᓴᓇᔭᖓ ᑕᕐᕆᔭᐅᓯᐅᖅᑎ, ᐊᔾᔨᓕᐅᕆᔨ, ᐊᒻᒪᓗ ᐃᓄᓕᕆᔨᑐᖃᒃᑯᑦ ᐃᖅᑲᓇᐃᔭᖅᑎᖓ ᑕᒃ ᒍᐃᑭᓐᓴᓐ (1919-2008). ᒍᐃᑭᓐᓴᓐ ᐊᒻᒪᓗ ᐊᔾᔨᓕᐅᕆᔨ ᔩᓐ ᐅᓗᐃ ᐊᔾᔨᓕᐅᕆᐊᖃᑦᑕᓚᐅᖅᑐᑦ ᐊᒥᓱᓂᒃ ᓄᖃᖓᑦᑎᐊᖅᑐᓂᒃ ᑕᐃᑲᓂ ᓴᓇᓪᓗᑎᒃ ᓄᓇᖓᑦ ᐅᓪᓗᖅᑐᔪᖅ . ᐃᓚᖓᑦ ᑖᒃᑯᐊ ᐊᔾᔨᖑᐊᑦ ᓴᕿᔮᖅᑐᖅ ᐃᓪᓚᐅᑦ ᐱᖃᑎᒋᓪᓗᒋᑦ ᐊᒥᓱᑦ ᐊᖑᑎᑦ ᓄᓇᖃᑎᒋᔭᓂ, ᑖᓐᓇᓗ ᑭᑎᐊᓐ ᕿᑦᓱᐊᓕᒃ, ᓛᓴᕇ ᐸᓂᓗᒃ, ᓵᓚᒪᓐ ᑲᓪᓗᒃ, ᐹᓪ ᐅᓪᓚᑎᑕᖅ ᐃᓪᓚᐅᑦ ᐊᒻᒪᓗ ᐃᓚᐃᔾᔭ ᐃᖅᖢᒃ, ᐸᕐᓇᒃᑎᓪᓗᒋᑦ ᐊᖑᓇᓱᒍᐊᕐᓂᐊᖅᑐᑦ. ᐅᓇ ᓇᒥᑐᐃᓐᓇᖅ ᑕᑯᔭᐅᓚᐅᖅᑐᖅ ᐊᒻᒪᓗ ᐊᔾᔨᖑᐊᕆᔭᐅᓪᓗᓂ ᑲᓇᑕᐅᑉ $2-ᖓᓂ.
ᐃᓪᓚᐅᑉ ᐊᔾᔨᓕᖑᐊᖓ ᖃᐅᔨᒪᔭᐅᑦᑎᐊᖅᑐᖅᑕᐅᖅ ᑭᓯᐊᓂ ᖃᐅᔨᒪᔪᖃᓗᐊᓐᖏᑦᑐᖅ ᑖᓐᓇ ᐊᔾᔨᓕᐊᖓ ᓇᖕᒥᓂᖅ ᐃᒻᒥᓂᒃ. ᐅᓇ ᓄᓇᕗᒻᒥ ᐃᑦᑕᕐᓂᑕᖃᕐᕕᒃ ᖃᓂᒋᔮᓂ 300 ᐊᔾᔨᖑᐊᑦ, ᑕᒪᕐᒥᒃ ᐅᓪᓗᖃᖅᑐᑦ 1950-ᓂᒃ, ᐊᔨᓕᐅᖅᓯᒪᔭᖏᑦ ᔪᓯᐱ ᐃᓪᓚᐅᑦ. ᑕᐃᑲᓂ ᐅᖃᐅᓯᒃᑯᑦ ᑐᓴᐅᒪᓂᖅ, ᐃᓐᓇᑐᖃᐃᑦ ᐃᖃᐅᒪᔪᑦ ᑕᑯᓪᓗᑎᒃ ᐃᓪᓚᐅᑦ ᐊᔾᔨᓕᐅᕆᖃᑦᑕᖅᑐᖅ ᐊᒻᒪᓗ ᐳᓛᖅᐸᒃᑐᖅ ᖃᓪᓗᓈᓄᑦ ᐊᔾᔨᓕᐅᕆᕙᒃᖢᓂ ᐃᒻᒥᓂᒃ ᐊᑐᖅᖢᓂ Kodak Duaflex ᐊᔾᔨᓕᐅᕈᑎᓂᒃ, ᐃᓚᖓᑦ ᐊᔾᔨᓕᐊᖓ ᓵᓚᖃᖅᓯᒪᔪᓃᑦᑐᖅ. ᑕᒃ ᒍᐃᑭᓐᓴᓐ ᑐᓂᔭᐅᖅᓯᒪᔭᖓ ᐃᓪᓚᐅᒧᑦ ᑰᑕᒃ ᐊᔾᔨᓕᐅᕈᑎᑦ ᑕᐃᑲᓂ ᐊᔾᔨᓕᐅᕆᓪᓗᓂ ᓄᓇᖓᑦ ᐅᓪᓗᖅᑐᔪᖅ (1952). ᑕᐃᑲᓂ 1954, ᒍᐃᑭᓐᓴᓐ ᑎᑎᕋᓚᐅᖅᑐᖅ ᑐᓴᒐᒃᓴᑎᒍᑦ ᐅᖃᓕᒫᒐᕐᑎᒍᑦ ᐊᑎᖃᖅᑐᖅ ᕗᑐᑯᓛᕝ ᑎᑎᕋᐅᓯᕆᓪᓗᒍ ᐃᓪᓚᐅᑉ ᐊᔾᔨᓕᐅᖃᑦᑕᖅᑕᖏᓐᓂᒃ.
ᑕᒪᕐᒥᐸᓗᒃ ᐃᓪᓚᐅᑉ ᒫᓐᓇᒧᑦ ᑎᑭᐅᑎᔪᑦ ᐊᔾᔨᓕᐊᕆᖃᑦᑕᖅᑕᕕᓂᖏᑦ ᐊᔾᔨᓕᐅᕋᑦᑕᖅᑕᕕᓂᖏᓐᓂᒃ 1951 ᐊᒻᒪᓗ 1954 ᐅᐊᖕᓇᖓᓂ ᐃᓚᖓᓂ ᕿᑭᖅᑖᓗᒃ, ᑕᐃᑲᓂ ᐊᕐᕌᒍᓂ ᐃᓪᓚᐅᒃᑯᑦ ᐃᓚᒌᑦ ᓅᓚᐅᖅᑎᓐᓇᒋᑦ ᖃᐅᓱᐃᑦᑐᕐᒧᑦ ᑕᒃᐹᓂ ᖁᑎᒃᑐᕐᒥᐅᓂ. ᐅᑯᐊ ᐊᔾᔨᖑᐊᑦ, ᐃᓚᐅᑉ ᐊᔾᔨᓕᐅᒐᖏᑦ ᐃᓅᓯᕆᔭᒥᓂᒃ ᓄᓇᒋᔭᒥ. ᐅᓇ ᑲᒪᓇᓛᖅ ᑖᒃᑯᓇᓂ ᐊᔾᔨᖑᐊᓂ ᓴᕿᑎᑦᑎᓯᒪᔪᖅ ᐊᖑᓇᓱᒃᑐᓂᒃ ᐊᒻᒪᓗ ᑕᑯᑎᑦᑎᔪᖅ ᐃᓪᓚᐅᑉ ᐊᔪᖏᑦᑐᐊᓘᓚᐅᕐᓂᖓᓂᒃ ᐊᖑᓇᓱᒃᑎᐅᓪᓗᓂ. ᑭᓯᐊᓂ ᐊᑯᓚᐃᓐᓂᖅᓴᒥᒃ ᐊᓯᖏᓐᓂᒃ ᐊᔾᔨᓕᐅᕆᓂᖅᓴᐅᓚᐅᕐᒪᑦ, ᐃᓪᓚᐅᑦ ᓵᑎᖃᑦᑕᓚᐅᖅᑕᖓ ᐊᔾᔨᓕᐅᕈᑎᓂ ᐃᓄᖕᓄᑦ ᑕᒫᓂ ᐱᖃᑎᒋᔭᒥᓄᑦ . ᓯᕗᓕᐊᓂ ᐊᖑᓇᓱᖑᐊᖅᑐᑦ ᐊᔾᔨᓕᐅᓚᐅᖅᑎᓐᓇᓂᐅᒃ ᓱᓕ, ᑕᒪᕐᒥᑦᑎᐊᖅ ᓄᓇᖃᑎᒋᔭᓂ ᐊᔾᔨᓕᐅᓚᐅᖅᑕᖏᑦ: ᐃᓪᓚᐅᑉ ᓄᓕᐊᖓ, ᕿᓪᓗᖅ, ᕿᑐᕐᖓᖏᓪᓗ, ᐊᓯᖏᑦᑕᐅᖅ ᑎᓴᒪᑦ ᓄᓇᖃᑎᓂ ᐃᓚᓂ ᐊᑕᐅᓯᕐᒥ ᓄᓇᓕᖕᓂ, ᐊᒻᒪᓗ ᐳᓛᖅᑐᑦ ᐃᓚᓂ ᐃᒃᐱᐊᕐᔪᖕᒥᑦ. ᐅᑯᐊ ᐊᔾᔨᖑᐊᑦ ᑕᑯᑎᑦᑎᔪᑦ ᖃᓂᒌᒃᑐᑯᓘᓚᐅᕐᓂᖏᓐᓂᒃ ᐃᓚᒌᑦ ᓄᓇᒥᖕᓂ. ᐅᓇ ᓴᕿᔮᖅᑎᑦᑎᔪᖅ ᐊᐃᕙᔪᓐᓇᖅᑐᖅ, ᐃᓪᓚᐅᑉ ᐊᔾᔨᓕᐊᖏᓐᓂ ᐃᓄᐃᑦ ᐱᐅᓯᑐᖃᖓ ᐊᑑᑎᖃᖅᑐᑦ ᐅᕝᕙᓘᓐᓃᑦ ᐃᓄᐃᑦ ᖃᐅᔨᒪᔭᑐᖃᖏᑦ.
ᑕᐃᑲᓂ ᐃᓅᔪᓐᓃᓛᓕᖅᖢᓂ ᐊᕐᕌᒍᓂ ᔪᓯᐱ ᐃᓪᓚᐅᑦ ᐊᒃᓱᕈᓐᓇᖅᑑᓚᐅᖅᑐᖅ ᑕᒪᐃᓐᓄᑦ ᐃᒻᒥᓄᑦ ᐊᒻᒪᓗ ᐃᓚᒥᓄᑦ, ᑐᖁᓚᐅᖅᑐᖅ ᓄᓕᐊᖓ, ᕿᓪᓗᖅ, ᐊᒻᒪᓗ ᐊᑖᑕᑯᖏᑦ ᐊᓈᓇᒃᑯᖏᑦ, ᐊᕐᓇᐅᔭᖅ ᐊᒻᒪᓗ ᐊᑯᒪᓕᒃ, ᐊᒻᒪᓗ ᑲᑉᐱᐊᓇᖅᑐᑰᓚᐅᖅᑐᑦ ᓅᑕᐅᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᖏᕐᕋᒥᖕᓂᑦ ᑕᐃᑯᖓ ᒥᑦᑎᒪᑕᓕᒃ ᑕᐅᕗᖓᓗ ᖃᐅᓱᐃᑦᑐᖅ ᑕᐃᑲᓂ 1955. ᐃᓪᓚᐅᑦ ᐃᓅᔪᓐᓃᓚᐅᖅᓯᒪᔪᖅ ᖃᐅᓱᐃᑦᑐᕐᒥ 1968-ᒥ.
ᑭᓯᐊᓂ ᑕᐃᔅᓱᒪᓂ ᐃᒻᒪᒃᑲᓐᓂᐋᕐᔪᒃ, ᐃᓪᓚᐅᑦ ᑲᔪᓯᓚᐅᖅᑐᖅ ᐊᔾᔨᓕᐅᕆᖃᑦᑕᖅᖢ. ᓴᓇᓚᐅᖅᑐᖅ ᖃᓂᒋᔮᓂ 77 ᐊᔾᔨᓕᐅᖅᑕᖏᑦ ᑲᓛᑦᖠᑦ ᓄᓇᖓᓄᑦ (ᐊᑯᑭᑦᑐᑦ). ᐃᓪᓚᐅᑦ ᐊᒻᒪᓗ ᖁᓕᐅᓐᖏᖔᖅᑐᑦ (9) ᐊᓯᖏᑦ ᐊᖑᑎᑦ ᑕᒪᐃᓐᓂᑦ ᐃᓄᐃᑦ ᓄᓇᖓᓂᑦ ᑲᑎᒪᔭᖅᑐᖅᑎᑕᐅᓚᐅᖅᑐᑦ ᐊᑭᓕᖅᑕᐅᓯᒪᓪᓗᑎᒃ ᑲᓇᑕ ᐃᓄᓕᕆᔨᑐᖃᒃᑯᑦ ᐊᒻᒪᓗ ᓄᓇᒥᐅᑕᓕᕆᔨᒃᑯᑦ. ᐃᓪᓚᐅᑦ ᐅᖃᓕᒫᒐᓕᐅᓚᐅᖅᑐᖅ ᑐᓴᒐᒃᓴᓂ ᐊᐅᓪᓚᖅᓯᒪᓂᕆᓚᐅᖅᑕᒥᖕᓂᒃ ᐃᓄᒃᑎᑐᑦ ᐅᖃᓕᒫᒐᕐᒧᑦ 1959-ᒥ. ᑲᓇᑕᐅᑉ ᒐᕙᒪᒃᑯᖏᑦ ᐊᖓᔪᖅᑳᑦ ᐃᓱᒪᓚᐅᖅᑐᑦ ᐊᑯᑭᑦᑐᖅ ᐃᓄᖏᑦ ᖃᓪᓗᓇᐃᖓᓂᖅᓴᐅᖕᒪᑕ ᐊᒻᒪᓗ ᐋᕿᒃᓯᓯᒪᓚᐅᖅᑐᑦ ᑲᔪᖏᖅᓴᐅᑎᒋᓪᓗᒍ ᐃᓄᖕᓄᑦ ᑕᐃᑲᖓᑦ ᐃᓄᐃᑦ ᓄᓇᖓᓂᑦ ᓱᖏᐅᑎᓂᐊᕐᒪᑕ ᖃᓪᓗᓈᑎᑐᑦ. ᑭᓯᐊᓂ ᐃᓪᓚᐅᑦ ᐊᓯᖏᓪᓗ ᐅᔾᔨᕈᓱᓚᐅᖅᑐᑦ ᖃᓅᑎᒋᔪᖅ ᐊᖓᔪᖅᑳᖏᑦ ᐃᓅᓂᖏᓐᓂᒃ. ᐊᕐᕌᒍᓄᑦ ᐊᒥᓱᓄᑦ, ᐃᓪᓚᐅᑦ ᐃᖃᐅᒪᓚᐅᖅᑕᖓ ᑖᓐᓇ ᑕᐃᑲᓃᓐᒥᕆᓚᐊᖅᑕᑎᒃ. ᑎᑎᕋᓚᐅᖅᑐᖅ ᒐᕙᒪᒃᑯᓄᑦ 1965:
1958-ᒥ, ᐅᕙᖓ ᐊᒻᒪᓗ ᐊᒥᓱᑦ ᐃᓄᐃᑦ ᐳᓛᕆᐊᓚᐅᖅᑐᒍᑦ ᐊᑯᑭᑦᑐᓄᑦ [ᐃᓄᐃᑦ]. ᑕᐃᒃᑯᐊ [ᐃᓄᖕᓂᒃ] ᐊᖓᔪᖅᑳᖃᓚᐅᖅᑐᑦ ᑕᐃᑲᓃᑦᑐᑦ. ᐃᓄᖁᑎᖏᑦ ᐊᒻᒪᓗ ᓄᓇᖓ ᐊᐅᓚᑕᐅᑦᑎᐊᖅᑐᖅ, ᐱᐅᓂᖅᓴᒥᒃ ᒫᓐᓇ ᑕᐃᒪᐃᑦᑑᓂᑦᑎᓐᓂᑦ ᐅᓪᓗᒥ.[i] ᐃᓪᓚᐅᑉ ᐊᔾᔨᓕᐊᖏᑦ ᑕᒫᖓᑦ ᐊᒻᒪᓗ ᐃᖃᐅᒪᔭᖏᑦ ᐊᑯᑭᑦᑐᓂ ᐊᑐᓚᐅᖅᑕᖏᑦ ᖃᐅᔨᒪᔨᒋᔭᐅᓪᓗᓂ ᐃᓄᖕᓄᑦ ᓇᖕᒥᓂ ᓄᓇᖁᑎᒥᓄᑦ.
ᔪᓯᐱ ᐃᓪᓚᐅᑦ, “ᖃᐅᓱᐃᑦᑐᖅ ᐊᖑᑎᖓ ᐳᓛᖅᑐᖅ ᐊᑯᑭᑦᑐᓄᑦ,” ᐃᓄᒃᑎᑐᑦ ᐅᖃᓕᒫᒐᖅ ᐅᐱᕐᖔᖅ (ᒪᐃ) 1959 ᒪᒃᐱᒐᖅ 11.
[1] ᔪᓯᐱ ᐃᓪᓚᐅᑦ ᑎᑎᕋᖓ ᖃᐅᔨᒪᔨᒻᒪᕆᖕᓄᑦ ᑲᒥᓯᓇ ᐱᕙᓪᓕᐊᑎᑦᑎᓂᕐᒥ ᓄᓇᑦᓯᐊᖅ ᒐᕙᒪᒃᑯᓄᑦ, ᐋᑐᕚ 30 ᓄᕕᐱᕆ 1965. ᑐᓵᔨ ᐱ. ᑰᓗᒃ. LAC RG22, Vol. 687, AC35.