ᐃᓪᓚᐅᑉ ᐃᓚᖏᑕ ᐅᓂᒃᑳᖏᑦ ᐱᔾᔪᑎᒋᓪᓗᒍᒋᑦ ᔪᓯᐱ ᐃᓚᐅᑦ ᐊᔾᔨᓕᐊᖏᓐᓂᒃ.
ᐊᔾᔨᓕᐊᖏᑦ ᐊᒻᒪᓗ ᐃᒻᒪᑲᓪᓚᓂᑕᐃᑦ ᓴᕿᔮᖅᑐᑦ ᑕᕝᕙᓂ ᑕᑯᔭᒐᖃᕐᕕᑦᑎᓐᓂ ᐱᓗᐊᖅᑐᒥᒃ ᐱᒻᒪᕆᐅᔪᑦ ᔪᓯᐱ ᐃᓪᓚᐅᑉ ᑭᖑᕚᖏᓐᓄᑦ ᐊᒻᒪᓗ ᐃᓚᖏᓐᓄᑦ ᐃᓄᒋᐊᖕᓂᖅᓴᐅᔪᓂ ᓄᓇᓕᖕᓂ. ᐊᑖᓂ ᐃᓚᖏᑦ ᑎᑎᕋᖅᓯᒪᔪᑦ ᐊᐱᖅᓱᖅᑕᐅᑎᓪᓗᒋᑦ ᑭᖑᕚᖏᑦ. ᖁᔭᓐᓇᒦᖅᐸᒃᑲ ᐊᔪᒋᑎᑦᑎᖕᒪᑕ ᓴᕿᑎᑦᑎᔪᓐᓇᖅᖢᑕ ᐅᖃᐅᓯᕆᓚᐅᖅᑕᒥᖕᓂᒃ.
ᑐᓐᖓᓱᒃᑎᑦᑎᕗᒍᑦᑕᐅᖅ ᓴᕿᑦᑐᓐᓇᕐᑎᑦᑎᖕᒪᑕ ᑖᒃᑯᐊ ᐃᓚᖏᓐᓂᑦ ᐅᖃᐅᓯᐅᔪᓂᒃ. ᑕᐃᒪᓗ ᐃᑲᔪᖃᑕᐅᔪᒪᒍᕕᑦ, ᐊᑏ ᐅᖃᕐᕕᒋᓗᒍ ᑭᐅᓗ ᐸᐃᓐ ᐅᕘᓇ carol.payne@carleton.ca
ᐹᓪ ᐅᓪᓚᑎᑕᖅ ᐃᓪᓚᐅᑦ
ᔪᓯᐱ ᐃᓪᓚᐅᑉ ᐊᖓᔪᖅᖠᖅᐹᖁᑎᖓ ᐹᓪ ᐅᓪᓚᑎᑕᖅ ᐃᓪᓚᐅᑦ ᐅᓂᒃᑳᓚᐅᖅᑐᖅ ᑖᔅᓱᒧᖓ ᑯᓕᔅᑎᓇ ᒍᓕᐊᒻᓴᓐ ᐊᒻᒪᓗ ᑭᐅᓗ ᐸᐃᓐ ᓂᐊᖁᖒᒥ, ᓯᓚᑎᑦᑎᐊᖓᓂ ᐃᖃᓗᐃᑦ. ᐃᖅᑲᓇᐃᔭᕈᓐᓃᖅᓯᒪᓕᖅᑐᖅ ᐸᓖᓯᐅᓚᐅᖅᓯᒪᔪᖅ ᐊᒻᒪᓗ ᓯᕗᓪᓕᖅᐹᖅ ᐃᓄᖕᓂ ᐊᒻᒪᓗ ᓯᕗᓪᓕᖅᐹᖅ ᓄᓇᕗᒻᒥ-ᐅᓅᔪᓂ ᐊᐅᐸᓗᒃᑐᓄᑦ ᐊᔪᕆᖅᓲᔨᕐᔪᐊᖑᓚᐅᖅᑐᖅ ᐅᑭᐅᖅᑕᖅᑐᒧᑦ, ᐹᓪ ᐅᓪᓚᑎᑕᖅ ᐃᓪᓚᐅᑦ 84-ᓂᒃ ᐅᑭᐅᖃᖅᖢᓂ ᑕᐃᔅᓱᒪᓂ. ᖁᕕᐊᒋᓪᓗᒋᑦ ᕿᒥᕐᕈᐊᓚᐅᖅᑕᖏᑦ ᐊᔾᔨᓕᐊᖏᑦ ᐅᓂᒃᑳᖅᖢᓂᓗ ᐅᕙᑦᑎᓐᓄᑦ ᑖᒃᑯᓂᖓ ᐊᔾᔨᖑᐊᓃᑦᑐᓂᒃ. ᐹᓪ ᐅᓪᓚᑎᑕᖅ ᐃᓪᓚᐅᑉ ᐃᕐᓂᖓ ᐃᐅᓕᒃ ᑲᑎᒪᖃᑎᖃᕐᑎᑦᑎᓚᐅᖅᑐᖅ ᐅᕙᑦᑎᓐᓂᒃ ᐊᑖᑕᒥᓄᑦ ᐊᒻᒪᓗ ᐃᑲᔪᖅᖢᓂ ᑲᑎᖓᕕᒃᓴᑦᑎᓐᓂ. ᑖᒃᑯᐊ ᐱᖓᓲᓪᓗᑎᒃ ᐅᓂᒃᑳᓚᐅᖅᑐᑦ ᐃᒡᓯᕙᓪᓗᑎᒃ ᓂᕆᕕᖓᓂ ᐊᔪᕆᖅᓲᔨᕐᔪᖅ ᐃᓪᓚᐅᑉ ᐃᒡᓗᖓᓂ ᐊᖏᕐᕋᖓᓂ ᓂᐊᖁᖒᒥ, ᐊᔾᔨᖑᐊᓂᒃ ᑲᑎᓯᒪᔪᑦ ᓯᕗᓂᐊᓃᓪᖢᑎᒃ ᓵᖓᓂ.
ᐊᔪᕆᖅᓲᔨᕐᔪᖅ ᐃᓪᓚᐅᑉ ᑕᑯᓚᐅᖅᓯᒪᓐᖏᑕᖏᒃ ᑕᒪᕐᒥᐸᓗᒃ ᐊᔾᔨᖑᐊᑦ ᐊᒻᒪᓗ ᖃᐅᔨᒪᓇᓚᐅᖅᑐᖅ ᐃᓗᑐᔪᒥᒃ ᐊᒻᒪᓗ ᐃᒃᐱᒍᓱᑲᐅᑎᒋᔪᖅ ᖃᐅᔨᒪᒐᒥᒋᑦ ᐃᒻᒥᒍᑦ. ᐃᒪᓐᓇ ᐅᕙᑦᑎᓐᓄᑦ ᐅᖃᓚᐅᖅᑐᖅ, “ᐅᓇ ᓄᓇ ᓱᓕ ᑕᐅᑐᖅᖁᖅᑕᕋ. ᑕᐃᑲᓃᓚᐅᕋᒪ ᐅᓪᓗᒐᓵᓗᖕᓄᑦ ᖃᖅᑲᐅᑉ ᓯᓚᑖᓅᕋᒪ ᓱᓕ ᑕᐅᑐᖅᖁᖅᑕᕋ.” (ᐹᓪ ᐅᓪᓚᑎᑕᖅ ᐃᓪᓚᐅᑦ 2018) ᐹᓪ ᐅᓪᓚᑎᑕᖅ ᐃᓪᓚᐅᑦ ᐊᔾᔨᖑᐊᖃᐃᓐᓇᓚᐅᖅᑐᖅ ᑖᒃᑯᓇᓂ. ᐊᔾᔨᓕᐅᖅᓯᒪᓚᐅᖅᑐᖅ ᒪᒃᑯᒃᑑᓪᓗᓂ ᐊᔾᔨᓕᐅᖅᑕᐅᖃᑕᐅᓪᓗᓂ ᐃᓚᒥᓂ ᐊᒻᒪᓗ ᓄᓇᖃᑎᒥᓂ. ᐱᑕᖃᓚᐅᕐᒥᔪᖅ ᐊᔾᔨᖑᐊᒐᓴᖕᓂ, ᑖᓐᓇ ᐊᒻᒪᓗ ᓯᕗᓪᓕᖅ ᓄᓕᐊᖓ, ᐃᓱᑭᑦᑐᖅ, ᐃᓚᖓ ᓘᑎ ᐸᓪᓗᖅ ᓇᔭᖏᑦᑕ, ᐱᓱᒃᑐᑦ ᑐᒃᓯᐊᕐᕕᖕᒧᑦ ᒥᑦᑎᒪᑕᓕᖕᒥ ᑲᑎᑎᑕᐅᓂᐊᖅᖢᑎᒃ ᑕᐃᔅᓱᒪᓂ ᐊᒻᒪᓗ ᑐᓐᖓᓱᒃᑎᑕᐅᓪᓗᑎᒃ, ᐊᓯᖏᑦ, ᐊᔾᔨᓕᐅᖅᓯᒪᓚᐅᕐᒥᔪᖅ ᐃᓚᐅᓪᓗᓂ ᐊᖑᓇᓱᒃᑐᓂ. ᐃᒻᒪᖄ ᐊᔾᔨᖑᐊᑦᑎᐊᕙᐅᓛᖅ ᑖᒃᑯᓇᖓᑦ ᐊᔾᔨᖑᐊᓂᑦ ᑖᓐᓇ ᓇᖏᖅᖢᓂ ᓴᓂᐊᓂ ᑐᖁᓕᖅᑐᖅ ᓇᓄᖅ. ᐊᖏᔪᒻᒪᕆᐋᓗᒃ ᓂᕐᔪᑎ ᐊᒃᓱᕈᖅᖢᓂ ᓂᐊᖁᓂ ᒪᑭᑎᓐᓇᓱᒃᑕᖓ ᑖᔅᓱᒪ ᒪᒃᑯᑑᓪᓗᓂ ᐊᖑᓇᓱᒃᑎᐅᒐᒥ ᓇᕿᒻᒥᔭᖓ ᐅᓈᕐᒥᓄᑦ. ᑕᐃᑲᓂ ᑲᑎᒪᑎᓪᓗᑕ ᐊᒻᒪᓗ ᐊᐱᖅᓱᖅᖢᑕ ᑖᒃᑯᐊ ᑯᓕᔅᑏᓇ, ᐋᓕᒃᓵᓐᑐ, ᐊᒻᒪᓗ ᐅᕙᖓ ᒥᑦᑎᒪᑕᓕᖕᒥ ᓯᕗᓂᑦᑎᓐᓂ ᐱᓇᓱᐊᕈᓯᕐᒥ, ᐅᓇ ᐱᐅᒋᔭᐅᓂᖅᐹᖑᓚᖑᖅᑐᖅ ᐊᔾᔨᖑᐊᔨᒫᓂᑦ. ᒪᒃᑯᒃᑐᑦ ᓄᑲᑉᐱᐊᑦ, ᐱᓗᐊᖅᑐᒥᒃ ᑖᒃᑯᐊ, ᐅᐸᒍᑎᔭᓪᖢᑎᒃ, ᑲᒪᔪᒥᒻᒪᕆᐋᓗᐃᑦ ᑕᑯᒐᒥᒃ ᐊᔪᖏᑦᑐᐋᓗᖕᒥᒃ ᐊᖑᓇᓱᒃᑎᒥᒃ, ᐃᒻᒥᖕᓂᑦ ᓇᓕᒧᒋᔭᒥᖕᓂᒃ; ᑕᐃᒪᓗ ᐱᔭᐅᓚᐅᖅᑐᑦ ᐊᔾᔨᓚᑖᖑᖅᑎᓯᒪᔭᕗᑦ ᐊᔾᔨᖑᐊᑦ. ᑕᐃᑯᖓ ᐅᑎᕐᓗᑕ ᓂᐊᖁᖒᒧᑦ, ᑕᐃᑲᓂ ᐃᒐᕕᖓᑕ ᓵᖓᓂ, ᐹᓪ ᐅᓪᓚᑎᑕᖅ ᐃᓪᓚᐅᑦ, ᐅᓇᑦᑕᐅᖅ, ᖁᖓᔮᑦᑎᐊᖅᑐᖅ ᐊᒻᒪᓗ ᐃᒡᓚᖅᐸᒃᖢᓂ ᒪᒃᐱᕌᖓᒥᒋᑦ ᐊᔾᔨᖑᐊᑦ ᑕᑯᖃᑦᑕᖅᖢᓂ ᖃᓄᐃᑦᑐᕕᓂᕐᓂᒃ ᐊᔾᔨᖑᐊᓂ.
ᓲᓴᓐ ᓴᓪᓗᕕᓂᖅ
ᐋᑐᕚᒥ 2023, ᓲᓴᓐ ᓴᓪᓗᕕᓂᖅ, ᐃᓪᓚᐅᑉ ᓄᑲᖅᖠᐹᖅ ᐸᓂᖓ, ᐃᒡᓯᕚᖃᑎᖃᓚᐅᖅᑐᖅ ᐊᐅᒐᑦᓈᖅ ᐃᑯᔅ ᐊᒻᒪᓗ ᑭᐅᓗ ᐸᐃᓐ ᓵᖓᓂ ᐊᑖᑕᖓᑕ ᐊᔾᔨᓕᐊᖏᓐᓂ. ᐅᓇᖅᑕᐅᖅ ᐅᐸᒍᑎᓯᒪᓚᐅᖅᑐᖅ ᐃᓱᒪᒥᒍᑦ ᐃᓚᒥᓂᒃ ᐊᒻᒪᓗ ᐊᑐᖅᓯᒪᔭᒥᓂᒃ ᑖᒃᑯᑎᒍᑦ ᐊᔾᔨᓕᐊᖏᑦᑎᒍᑦ.
ᓲᓴᓐ ᓴᓪᓗᕕᓂᖅ ᓄᓇᖃᖅᑐᖅ ᖃᐅᓱᐃᑦᑐᕐᒥ ᑕᐃᒪᖓᓂᑦ ᐃᓚᖏᑦ ᓅᑕᐅᓚᐅᖅᓯᒪᖕᒪᑕ 1955-ᒥ. ᒪᐃᔫᓚᐅᖅᓯᒪᓪᓗᓂ ᕼᐋᒻᓚᒃᑯᓂ ᐊᒻᒪᓗ ᖃᐅᔨᒪᔨᒋᔭᐅᓪᓗᓂ ᖁᑎᒃᑐᕐᒥᐅᓄᑦ ᓅᑕᐅᓯᒪᓂᕐᒧᑦ. ᐅᓇ ᑕᑯᔭᕆᐅᓐᖏᑕᖏᑦ ᑖᒃᑯᐊ ᓲᓴᐅᑉ ᑕᑯᓪᓗᒋᑦ ᐊᑖᑕᖓᑕ ᐊᔾᔨᓕᐊᖏᑦ ᐊᒻᒪᓗ ᐊᔾᔨᓕᐅᕈᑎᖓ ᐃᒻᒥᖕᓄᑦ ᐊᑦᑕᑕᕈᑎᑦᑎᐊᖅᓯᒪᔪᖅ. ᑕᐃᒪᓗ ᐃᒪᓐᓇ ᐅᕙᑦᑎᓐᓄᑦ ᐅᖃᓚᐅᖅᑐᖅ, “ᐃᖃᐅᒪᔪᕋ ᕿᒥᕐᕈᐊᖅᖢᒋᑦ ᑖᒃᑯᐊ ᐊᑖᑕᒪ ᐊᔾᔨᓕᐊᖏᑦ. ᖃᐃᑦᑎᓚᐅᖅᓯᒪᔪᖅ ᐊᔾᔨᓕᐅᕈᑎᒥᒃ ᓇᓪᓕᐅᑎᒐᒪ. ᐃᓱᒪᔪᖓ ᑕᒪᓐᓇ ᑲᔪᓯᖁᓚᐅᖅᑕᖓ ᐊᔾᔨᓕᐅᕆᖃᑦᑕᕐᓂᓂ.” (ᓲᓴᓐ ᓴᓪᓗᕕᓂᖅ, ᒫᑦᓯ 2023).
ᓲᓴᓐ ᓄᑕᕋᓛᑯᓘᓚᐅᖅᓯᒪᔪᖅ, ᓱᓕ ᐊᒫᖅᑕᐅᖃᑦᑕᖅᖢᓂ ᐊᓈᓇᒥᓂᑦ, ᕿᓪᓚᐅᑉ, ᐊᒪᐅᑖᓄᑦ ᐃᓚᒌᑦ ᓅᑕᐅᑎᓪᓗᒋᑦ ᖁᑎᒃᑐᕐᒥᐅᓄᑦ. ᑕᐃᒪᓐᓇᐅᓂᖓᓄᑦ, ᓇᖕᒥᓂᖅ ᐃᖃᐅᒪᔭᖃᓐᖏᑦᑐᖅ ᓄᓇᑐᐃᓐᓇᓂ ᓄᓇᖃᖅᖢᑎᒃ, ᑕᐃᑲᓂ ᑕᒪᕐᒥᐸᓗᒃ ᐊᔾᔨᖑᐊᑦ ᐊᔾᔨᓕᐅᖅᑕᐅᓯᒪᔪᑦ; ᑭᓯᐊᓂ ᑖᒃᑯᐊ ᐃᖃᐃᑎᑦᑎᖃᑦᑕᓚᐅᖅᑐᑦ ᐊᑖᑕᖓᑕ ᐊᖑᓇᓱᖃᑦᑕᕐᓂᕕᓂᖏᓐᓂᒃ ᐊᒻᒪᓗ ᐊᐅᓪᓚᖃᑎᒋᕙᒡᖢᒍ ᓇᑦᑎᕋᓱᒋᐊᖅᖢᑎᒃ ᓄᑕᕋᐅᓪᓗᓂ. ᑕᐃᑲᓂ ᑕᑯᒐᒥᒋᑦ ᐊᔾᔨᖑᐊᑦ ᐊᓈᓇᖓᑕ, ᕿᓪᓚᖅ, ᓲᓴ ᖁᖓᓚᐅᖅᑐᖅ ᐊᒻᒪᓗ ᐃᖃᐅᒪᓪᓗᓂ ᒥᖅᓱᐃᓐᓇᐅᔭᓚᐅᕐᓂᖓᓂᒃ ᐊᒻᒪᓗ ᐱᐅᔪᒻᒪᕆᐋᓗᖕᓂᒃ ᓴᓇᖃᑦᑕᖅᖢᓂ ᐊᓐᓄᕌᒃᓴᓂᒃ. ᑕᒪᐃᓐᓄᑦ, ᐊᔾᔨᖑᐊᑦ ᐱᓯᒪᓂᖃᖅᑐᑦ ᐃᑎᔪᒥᒃ ᐃᓚᒌᑦ ᑲᑎᖓᑦᑎᐊᕐᓂᕐᒥᒃ: “ᓄᓇᖃᓚᐅᖅᑐᑦ ᓴᐃᓕᔪᒥ. ᐸᕿᑦᑎᐊᖅᑐᑦ. ᓴᐃᓕᑦᑎᐊᓚᐅᖅᑐᑦ, ᑕᑯᓐᓇᖅᖢᒋᑦ ᐊᔾᔨᖑᐊᑦ. ᐃᒪᓐᓇᑦᑎᐊᖅ ᐊᔾᔨᒋᓐᖏᑦᑎᐊᓕᖅᑕᖏᑦ ᐃᓅᓯᕗᑦ ᑕᐃᔅᓱᒪᓂ ᖃᓄᖅ ᐃᓅᓯᕆᓕᖅᑕᑦᑎᓐᓂᑦ. ᑕᑯᓐᓇᖅᖢᒋᑦ ᐱᓕᕆᖃᑦᑕᕈᓯᕗᑦ ᐊᖏᕐᕋᑦᑎᓐᓂ ᐅᕝᕙᓘᓐᓃᑦ ᓄᓇᓕᖕᓂ. ᐊᐅᓪᓛᖃᑦᑕᖅᑐᒍᑦ ᖃᓂᒌᓕᑦᑎᐊᒃᑲᓐᓂᕐᓂᐊᕐᒪᑕ ᐃᓚᒌᑦ ᐊᒻᒪᓗ ᖃᐅᔨᓇᖅᑐᖅ ᑕᐃᔅᓱᒪᓂ ᖃᓂᒌᑦᑎᐊᓚᐅᖅᑐᖅ.” (ᓲᓴᓐ ᓴᓪᓗᕕᓂᖅ, ᒫᑦᓯ 2023)
ᓲᓴᓐ ᐃᖃᐅᒪᔪᖅ ᖃᓄᖅ ᐃᓪᓚᐅᑦ ᐊᒻᒪᓗ ᕿᓪᓚᖅ ᑐᓐᖓᓱᒃᑎᑦᑎᖃᑦᑕᓚᐅᖅᑐᖅ ᐊᒻᒪᓗ ᐸᕿᕙᒡᖢᑎᒃ ᐃᓚᒥᖕᓂᒃ, ᑖᒃᑯᐊᓗ ᑲᓪᓗᒃᑯᑦ ᐃᓚᒌᑦ ᐊᒻᒪᓗ ᐃᓚᖏᑦ ᐳᓛᕆᐊᖅᑐᑦ ᒥᑦᑎᒪᑕᓕᖕᒥᑦ. ᑕᑯᔭᐅᑎᓚᐅᕐᒥᔭᖏᑦ ᐊᔾᔨᖑᐊᑦ ᐃᓚᒥᓄᑦ ᖃᐅᓱᐃᑦᑐᕐᒥ.
ᔮᓱᐊ ᐃᓪᓚᐅᑦ
ᒪᒃᑯᖕᓂᖅᓴᐅᔪᓂ ᐃᓪᓚᐅᑉ ᐃᓚᖏᓐᓂ, ᐊᔾᔨᖑᐊᑦ ᑕᐃᒫᒃᑕᐅᖅ ᐃᖃᐅᒪᑦᑎᐊᓐᖏᑕᖏᑦ. ᔮᓱᐊ ᐃᓪᓚᐅᑦ, ᐹᓪ ᐅᓪᓚᑎᑕᖅ ᐃᕐᓂᖓ ᐊᒻᒪᓗ ᐃᓪᓚᐅᑉ ᐃᕐᖑᑕᖓ, ᐅᓂᒃᑳᓚᐅᖅᑐᑦ ᑖᔅᓱᒧᖓ ᐋᓕᒃᔅ ᐊᓇᕕᐊᐱᒃ, ᑖᒃᑯᓄᖓ ᑯᓕᔅᑎᓇ ᒍᓕᐊᒻᓴᓐ ᐊᒻᒪᓗ ᑭᐅᓗ ᐸᐃᓐ ᒥᑦᑎᒪᑕᓕᖕᒥ. ᑖᒃᑯᑎᒍᑦ ᐊᔾᔨᖑᐊᕐᑎᒍᑦ, ᐃᓱᒪᒋᔭᖓ ᑖᒃᑯᓂᖓ ᐊᑖᑕᖓᑕ ᐃᓕᓐᓂᐊᖅᑎᑦᑎᔾᔪᑎᒋᓚᐅᖅᑕᖏᑦ ᐃᒻᒥᓄᑦ ᐊᖑᓇᓱᖕᓂᖅ ᐊᒻᒪᓗ ᐊᔾᔪᒥᒋᓗᒍ ᐊᑖᑕᑦᓯᐊᓂ, ᐃᓪᓚᐅᑦ, ᐊᒻᒪᓗ ᐊᒪᐅᓂ, ᐊᑯᒪᓕᒃ, ᑐᓂᓯᓯᒪᔪᑦ. ᔮᓱᐊ ᐃᓪᓚᐅᑦ ᐅᖃᐅᑎᓚᐅᖅᑖᑎᒍᑦ ᓯᕗᓪᓕᖅᐹᒥᒃ ᑑᒑᓕᖕᒥᒃ ᕿᓚᓗᒐᕆᐅᕈᓯᕐᒥᓂᒃ. ᑑᒑᓕᑦ ᕿᓚᓗᒐᐃᑦ ᐊᒥᓲᖕᒪᑕ ᐃᒪᖏᓐᓂ ᐊᕙᓗᐊᓂ ᐊᐅᓚᑦᑎᕕᒃ. ᑭᓯᐊᓂ ᔮᓱᐊ ᐃᓪᓚᐅᑦ ᐊᒻᒪᓗ ᐊᐱᖅᓱᖅᑐᑦ ᖃᐅᔨᒪᖁᔨᓚᐅᖅᑐᑦ ᒪᕐᕉᖕᓂᒃ ᑑᒑᓕᒃ ᐊᑕᐅᓯᖅ ᕿᓚᓗᒐᖅ ᐱᑕᖃᕋᔪᓐᖏᑦᑐᖅ [ᓴᕿᔮᖅᑐᖅ 7.17] ᐅᓂᒃᑳᓚᐅᖅᓯᒪᔪᖅ ᐃᒪᓐᓇ, “ᓯᕗᓪᓕᖅᐸᐅᑎᓪᓗᒋᑦ ᐃᒃᐱᒍᓱᑦᑎᐊᕋᓱᓲᖑᔪᒍᑦ ᓂᕐᔪᑎᓂᒃ ᐊᕙᓗᑦᑎᓃᑦᑐᓂᒃ, ᐃᒡᓯᓐᓇᐃᑐᐃᓐᓇᕆᐊᖃᓐᖏᑦᑐᑎᑦ ᐱᔭᕐᓂᒃ, ᑐᓂᓗᒋᑦ ᐱᔭᑎᑦ ᐃᓚᖕᓄᑦ ᑖᒃᑯᐊ ᑳᒃᑐᑦ.” ᑕᐃᒪᓗ ᔮᓱᐊ ᐅᓂᒃᑳᓕᓚᐅᖅᑐᖅ ᐊᖑᓇᓱᖕᓂᕐᒥᒃ ᐊᒻᒪᓗ ᐃᓚᒌᑦ ᑲᑎᖓᑦᑎᐊᕐᓂᖏᓐᓂᒃ ᓄᓇᒧᑦ:
“…ᑐᓵᓕᕋᑦᑕ ᑑᒑᓕᖕᓂᒃ ᕿᓚᓗᒐᕐᓂᒃ...ᐊᑖᑕᒐᓗ, ᐅᕙᖓᓗ ᐊᒻᒪᓗ ᐊᕐᓇᖃᑎᒐ ᐃᖁᒪᐃᓐᓇᖅᖢᑕ. ᓯᕗᓪᓕᖅᐸᐅᒐᒪ ᐅᐸᒃᓯᓚᐅᖅᐳᖓ 7 ᒪᒃᑯᒃᑐᑦ ᕿᓚᓗᒐᕐᓂᒃ (ᑑᒑᓕᖕᓂᒃ ᕿᓚᓗᒐᕐᓂᒃ) ᑑᒑᖃᖅᖢᑎᒃ. ᖁᑭᓕᒑᓕᕐᒪᒍ ᑖᓐᓇ ᓯᕗᓪᓕᖅᐹᖓ ᑭᓯᐊᓂ ᐊᓯᒥᓂᒃ ᑐᓄᒥᓃᑦᑐᓂᑦ ᐱᔭᕆᔭᐅᓪᓗᓂ. ᑖᓐᓇ ᑭᖑᓪᓕᖅᐹᖑᔪᖅ ᖁᑭᖅᑕᐅᓪᓗᓂ ᑭᓯᐊᓂ ᖃᐅᔨᒪᓚᐅᖅᑐᖅ ᕿᑎᐊᓂ ᐱᑕᖃᖅᑐᖅ. ᖁᑭᕋᒃᑯ ᖃᐅᔨᒪᓚᐅᖅᑕᕋ ᐱᔭᕋ, ᑐᖁᓕᖅᑐᖅ ᐊᒻᒪᓗ ᒪᕐᕉᒃ ᐊᓯᖏᑦ ᑑᒑᓕᑦ ᕿᓚᓗᒐᐃᑦ ᐅᐸᒍᑎᓪᓗᑎᒃ ᓴᓂᐊᓄᑦ ᐊᒻᒪᓗ ᐃᕿᖅᖢᒍ ᐊᒻᒪᓗ ᐊᖃᕈᑎᓪᓗᒍ. ᑕᐃᒪᓐ ᐱᓲᑦ ᓇᖕᒥᓂᖅ ᐃᓚᒥᖕᓂᒃ. ᓴᐳᒻᒥᖃᑦᑕᐅᑎᓪᓗᑎᒃ ᐊᒻᒪᓗ ᐃᒻᒪᖄ ᖃᐅᔨᓇᓱᓲᖑᖕᒪᑕ ᖃᓄᐃᖏᒃᑲᓗᐊᕐᒪᖔᑕ. ᑕᐃᒪᓗ ᐅᖃᖃᐅᒐᒪ ᑕᑯᒃᑯᓂᕈᓐᓃᓚᐅᖅᑕᕋ.
ᑭᓯᐊᓂ ᑕᐃᑲᓂᑦᑕᐅᖅ ᐊᓯᐊᓂ ᑕᐃᑲᓂᑦᑕᐃᓐᓇᖅ ᕿᓚᓗᒐᖅ ᒪᒃᑯᒃᑐᑦ ᐳᐃᔪᖅ, ᓯᕗᓪᓕᖅᐹᒥᒃ ᕿᓚᓗᒐᕋᓱᖃᑎᒋᔭᕋ ᐊᑖᑕᒐ. ᓯᕗᓪᓕᖅᐹᒥᒃ ᐊᖑᓇᓱᖃᑎᒋᔭᕆᐅᖅᑕᕋ ᐊᒻᒪᓗ ᓯᕗᓪᓕᖅᐹᕋ ᑐᖂᑦᑎᔭᕆᐅᖅᖢᖓ. ᐅᓈᕐᒧᑦ ᓇᐅᓕᓚᐅᖅᑕᕋ ᓇᖕᒥᓂᖅ ᑕᐃᑲᓕ ᐊᑖᑕᒐ ᐃᒻᒪᖄ ᐅᖓᓯᒃᑎᒋᓪᓗᓂ ᐊᕝᕙᓗᐊᖓᓂᒃ ᒪᐃᓕ ᐅᕙᑦᑎᓐᓂᑦ, ᐊᕐᓇᖃᑎᒐ ᐊᑭᐊᓃᑦᑐᖅ ᐃᕆᐊᓛᖅᑐᖅ ᐃᑲᔪᖅᑕᐅᔪᓐᓇᕐᒪᖔᕐᒥᓂᒃ ᐃᒻᒥᓂᒃᑕᐅᖅ ᕿᓚᓗᒐᕋᒥ. ᑕᐃᒪᓗ ᐊᑖᑕᒐ ᐃᓱᒪᓕᐅᕆᐊᖃᓚᐅᖅᑐᖅ ᓇᓕᐊᖕᓄᑦ ᐅᐸᒍᑎᓂᐊᕐᒪᖔᑦ. ᑖᓐᓇ ᑑᒑᓕᒃ ᕿᓚᓗᒐᖅᑕᕋ ᐊᑭᐊᓄᐊᕐᒪᑦ ᑕᐃᒪᓗ ᖃᐅᔨᓇᓱᓚᐅᖅᑐᖓ ᖃᓄᖅ ᐃᑳᕈᓐᓇᕐᒪᖔᕐᒪ. ᑕᐃᒪᓗ ᐃᑳᕋᒪ ᐊᒻᒪᓗ ᓇᐅᓕᒃᖢᒍ ᐊᒻᒪᓗ ᑕᐃᒪ ᐅᑎᖅᖢᓂ ᐅᕙᓐᓄᑦ.
ᐋᒃᑐᖅᑎᓪᓗᑕ ᓂᕿᒃᓴᑦᑎᓐᓂᒃ ᐊᑖᑕᒐ ᐅᖃᖅᖢᓂ ᓈᒻᒪᒃᓯᓂᕋᖅᖢᓂᒋᑦ, ᓈᒻᒪᒃᓯᔪᑦ ᕿᓚᓗᒐᖅᑕᕗᑦ, ᐱᔪᒪᑐᐃᓐᓇᖅᖢᓂ ᐊᑕᐅᓯᕐᒥᒃ ᒪᒃᑯᒃᑐᒥᒃ, ᐊᑕᐅᓯᖅ ᕿᕐᓂᖅᑕᐅᓪᓗᓂ ᐊᒻᒪᓗ ᒪᕐᕉᒃ ᓂᕿᑦᑎᐊᕆᖕᓂᖅᓴᐅᓪᓗᑎᒃ ᐱᔭᐅᓂᐊᖅᑐᓂᒃ ᐊᕐᓇᓂᑦ, ᐊᕿᓐᓂᖅᓴᓂᒃ, ᑎᓯᓗᐊᕋᑎᒃᓗ. ᑕᐃᒪᓗ ᐊᖏᕐᕋᐅᓕᖅᖢᑕ, ᐃᑳᓕᕐᒥᒐᑦᑕ ᐊᖏᔪᒻᒪᕆᐋᓗᒃ ᐃᓐᓇᖅ ᕿᓚᓗᒐᖅ ᐳᐃᔪᖅ ᓯᕗᓂᑦᑎᐊᑦᑎᓐᓂ, ᐊᖏᓂᖅᓴᖅ ᐅᕙᑦᑎᓐᓂᑦ, ᑕᐃᒪᓗ ᖄᖏᖅᑎᓚᐅᖅᑕᕗᑦ ᐊᒻᒪᓗ ᐃᑳᕋᒥ ᑕᐃᒪᓗ ᐊᓯᐅᓪᓗᓂ ᐊᒻᒪᓗ ᐊᖏᕐᕋᐅᓕᖅᖢᑕ. ᐊᒃᓱᕈᖅᖢᑕ ᐱᓕᕆᖃᑦᑕᓚᐅᖅᑐᒍᑦ ᐊᖏᕐᕋᐅᓇᓱᒃᖢᑕ ᑕᒫᓂ ᓄᓇᖓᓂ ᐅᐱᕐᖔᒃᑯᑦ, ᓯᑯ ᓵᑦᑐᑯᓘᓕᖅᖢᓂ. ᐊᑖᑕᑦᓯᐊᕐᒪ ᐃᓕᓐᓂᐊᖅᑎᓯᒪᔮᖓ ᓇᐅᒃᑰᕆᐊᖃᕐᒪᖔᕐᒪ ᑕᒫᓂ ᓄᓇᑦᑎᓐᓂ, ᐱᓗᐊᖅᑐᒥᒃ ᑕᒪᓐᓇ ᓄᓇ ᐃᓅᕕᒋᓯᒪᔭᖓᓂ. ᑕᒪᓐᓇ ᐊᑖᑕᒪ ᐊᖑᓇᓱᒃᕕᖓ. ᑕᒫᓂᓪᓗᐊᑕᖅ ᐊᖑᓇᓱᖃᑦᑕᖅᑐᒍᑦ." (ᔮᓱᐊ ᐃᓪᓚᐅᑦ, ᒪᐃ 2018)