ᐃᓄᐃᑦ ᑕᐃᒪᖓᓂᑐᖄᓗᒃ ᓴᓇᑐᔪᒻᒪᕆᐋᓗᐃᑦ ᐅᑭᐅᖅᑕᖅᑐᖅ ᓯᓚᖓᓂ. ᐅᓇ ᐃᑲᔫᑎᒃᓴᖅᓯᐅᕐᓂᖅ ᓇᓗᓇᖏᑦᑐᖅ ᑕᒪᐅᓐᓇ ᓴᓇᑐᓂᖏᓐᓄᑦ ᐃᓄᐃᑦ ᓲᕐᓗ ᐃᒡᒐᐃᑦ, ᐊᒪᐅᑎᑦ, ᐊᒻᒪᓗ ᖃᔭᖅ ᑕᑯᒃᓴᐅᔪᑦ ᐊᔾᔨᖑᐊᓂ N-1979-051: 1969 ᐊᒻᒪᓗ N-1979-051: 1866, ᐊᒻᒪᓗ ᓴᓇᔭᖏᑦ ᐃᒡᓗᕕᒐᐃᑦ (N-1979-051: 1883). ᑕᐃᒪᓐᓇᐅᒐᓗᐊᖅᑎᓪᓗᒍ, ᐊᑑᑎᖃᕐᓂᖓ ᖃᓄᖅᑑᕐᓂᖅ ᐃᓚᖏᓐᓇᖏᓅᖓᕗᖅ ᑭᓱᓂᒃ ᓴᕿᑦᑎᓂᐊᖅᑎᓪᓗᒋᑦ ᑕᐃᒪᓗ ᐃᓄᐃᑦ ᐊᑐᖅᒪᒋᑦ ᑐᓐᖓᔾᔪᑎ ᐃᓅᓯᖏᓐᓄᑦᑕᐅᖅ. ᑕᐃᑲᓂ ᐊᒃᓱᕈᕐᓇᖅᑑᖃᑦᑕᖅᑎᓪᓗᒍ, ᓲᕐᓗ ᐊᓯᕈᖅᓯᒪᔪᑦ ᐊᔾᔨᓕᐊᖏᓐᓂ ᐃᓪᓚᐅᑉ, ᐃᓄᐃᑦ ᑲᔪᖏᖅᓴᔭᐅᕗᑦ ᐊᑐᕐᓗᒋᑦ ᐱᔭᕐᓂᓐᖏᑦᑐᑦ ᓄᑖᓂᒃ ᐱᓕᕆᔾᔪᑎᑦᑎᒍᑦ ᐊᒻᒪᓗ ᓱᖏᐅᑎᒋᓗᒋᑦ ᑕᐃᒪᓐᓇᐅᔭᕆᐊᖃᖅᑐᑦ.
ᑕᒃᑯᑎᒍᑦ ᐊᔾᔨᖑᐊᑎᒍᑦ ᑕᑯᔪᑎᑦ ᐊᔾᔨᒌᓐᖏᑦᑐᓂᒃ ᐃᓄᐃᑦ ᐊᑐᓲᖏᓐᓂᒃ ᐃᑲᔫᑎᒋᓂᐊᖅᑕᒥᖕᓄᑦ ᐊᑐᐃᓐᓇᖁᑎᖃᖅᑎᓪᓗᒋᑦ ᐆᒪᔾᔪᑎᒃᓴᑐᐃᓐᓇᐅᓐᖏᑦᑑᒐᓗᐊᓄᑦ, ᑭᓯᐊᓂ ᖃᓄᐃᖏᑦᑎᐊᕐᓂᐊᕐᒪᑕ ᐅᑭᐅᖅᑕᖅᑐᒥ ᓄᓇᖃᖅᖢᓂ. ᑕᐃᒪᓗ ᖃᓪᓗᓈᑦ ᑎᑭᑉᐸᓪᓕᐊᓕᖅᑎᓪᓗᒋᑦ ᐅᑭᐅᖅᑕᖅᑐᒧᑦ, ᐃᓄᐃᑦ ᐃᒡᓯᓇᐃᓚᐅᓐᖏᑦᑐᑦ ᐱᐅᓯᑐᖃᕐᒥᖕᓂᒃ ᐊᒻᒪᓗ ᓴᓇᕐᕈᑎᑐᖃᕐᒥᖕᓂᒃ ᑭᓯᐊᓂ ᓱᖏᐅᑎᓚᐅᖅᑐᑦ ᐱᐅᓯᑐᖃᑎᒃ ᒫᓐᓇᒧᑦ ᐊᑐᖅᖢᒋᑦ ᐃᓚᓕᐅᑎᓪᓗᒋᑦ ᓄᑖᓄᑦ ᐱᖁᑎᓄᑦ ᑕᒪᒃᑯᐊᓗ ᐊᑐᐃᓐᓇᕈᖅᐸᓪᓕᐊᔪᑦ ᐃᒥᖕᓄᑦ. ᐅᓇ ᐆᒃᑑᑎᒋᓗᒍ, ᑕᑯᒍᖕᓂ ᐅᓇ ᐊᔾᔨᖑᐊᖅ N-1979-051: 1972, ᑕᑯᓂᐊᖅᑐᑎᑦ ᐃᓄᐃᑦ ᐃᓚᓕᐅᔾᔨᓯᒪᔪᑦ ᑐᓴᒐᒃᓴᓂᒃ ᑎᑎᖃᓂᒃ ᖃᕐᒪᕐᒥᖕᓄᑦ ᐊᔾᔨᖑᐊᖁᑎᒋᓪᓗᒋᑦ ᑲᔾᔮᕐᓇᖅᓴᐅᑎᒋᓪᓗᒋᑦ, ᑭᓯᐊᓂᑦᑕᐅᖅ ᓱᕈᖅ ᑲᑕᒐᕐᓂᐊᓐᖏᒻᒪᑦ ᐃᔾᔪᖓ. ᑕᒪᐅᓐᓇ ᐊᒥᓱᑦ ᐊᔾᔨᖑᐊᑦ ᓴᕿᔮᖅᑐᑦ ᐊᔾᔨᒌᓐᖏᑦᑎᐊᖅᑐᑦ ᐱᖁᑎᑦ ᐊᑐᖅᑕᐅᔪᑦ ᐊᓐᓄᕌᓕᐊᖑᓯᒪᔪᑦ. ᐃᓄᐃᑦ ᐊᑐᖅᓯᖃᑦᑕᓕᓚᐅᖅᑐᑦ ᖃᓪᓗᓈᖅᑕᓂᒃ ᑎᑭᐅᑎᔭᐅᔪᓂᑦ ᖃᓪᓗᓈᖅᑕᓂᑦ ᒥᖅᓱᖅᖢᒋᑦ ᐊᒪᐅᓯᐊᕆᓪᓗᒋᑦ ᐊᒻᒪᓗ ᖁᓕᑦᑕᐅᔭᓕᐊᕆᓪᓗᒋᑦ ᔭᐸᓕᐊᕆᓪᓗᒋᑦ, ᐃᓛᓂᒃᑯᑦ ᓇᖕᒥᓂᖅ ᐋᕿᑦᑎᐊᒃᑲᓐᓂᖅᐸᒃᖢᒋᑦ ᓴᓇᓯᒪᓂᖓ; ᑕᒪᓐᓇ ᐊᑐᖅᑕᐅᔪᖅ ᓱᓕ ᐃᓄᐃᑦ ᒥᖅᓱᕈᓯᖓ ᐅᓪᓗᒥ.
ᐃᓄᐃᑦ ᐅᕐᐱᕈᓱᒃᑐᑦ ᑕᒪᓐᓇ ᐊᓯᖑᕐᓂᖅ ᐊᒻᒪᓗ ᐊᒃᓱᕈᓐᓇᓚᐅᖅᑐᑦ ᐃᓚᖓᓂ ᐃᓅᓯᖓᓂ. ᑕᒪᓐᓇ ᕿᒪᒐᒃᓴᐅᓐᖏᑦᑐᖅ ᐳᐃᒍᒐᒃᓴᐅᓐᖏᑦᑐᖅ, ᑭᓯᐊᓂ ᐱᕚᓪᓕᕈᑎᒋᒋᐊᖔᕐᓗᒍ ᐱᓕᕆᐊᕆᓗᒋᑦ ᐊᑑᑎᔪᑦ ᓲᕐᓗ ᐊᑐᕐᓗᒍ ᖃᓄᖅᑑᕐᓂᖅ. ᐊᔾᔨᖑᐊᑦ ᑕᕝᕙᓃᑦᑐᑦ ᑐᑭᓕᐅᕈᑎᒋᓯᒪᔪᑦ ᑕᑯᑎᑦᑎᔪᑦ ᖃᓄᖅ ᑲᔪᓯᔪᓐᓇᕐᓂᑦᑎᓐᓂᒃ ᐃᓛᓐᓂᒃᑯᑦ ᓴᐱᕐᓇᓚᐅᖃᑦᑕᕋᓗᐊᖅᑎᓪᓗᒍ ᖃᓄᐃᓕᖓᑎᑕᐅᓪᓗᓂ ᑕᐃᒫᒃ ᐃᓱᒪᑦᑎᐊᖃᑦᑕᖅᖢᓂ ᐊᓯᐊᒎᕐᕕᒃᓴᓂᒃ ᐊᒻᒪᓗ ᓴᐱᓕᖅᑕᐃᓕᒪᓪᓗᓂ.