ᐊᑑᑎᖃᖅᑐᑦ ᓲᕐᓗ ᐃᑲᔪᖅᑎᒌᑦᑎᐊᕐᓂᖅ,  ᐊᒃᓱᕉᑕᐅᕗᖅ ᐱᒻᒪᕆᐅᓂᖓᓂ ᐃᑲᔪᖅᑎᒌᒡᓗᑎᒃ, ᑕᒪᓐᓇ ᑕᒪᐃᓐᓄᑦ ᐃᓚᒋᔭᖓ ᖃᓄᐃᖏᑦᑎᐊᖁᓪᓗᒋᑦ ᓄᓇᓖᑦ. ᐃᓄᐃᑦ ᐃᓕᓴᖅᓯᓯᒪᔪᑦ ᐱᕚᓪᓕᕐᑎᑦᑎᔪᓐᓇᖅᑐᑦ ᓴᓇᖃᑎᒌᑦᑎᐊᕈᑎᒃ, ᐱᓗᐊᖅᑐᒥᒃ ᐱᔾᔪᑎᒋᓪᓗᒍ ᐃᒃᑮᕌᓘᓱᖑᖕᒪᑦ ᐅᑭᐅᖅᑕᖅᑐᖅ ᓯᓚᖓ ᐊᕙᑎᖓ ᑕᐃᑲᓂ ᐆᒪᔭᕆᐊᒃᓴᖅ ᐊᔪᕐᓇᖅᑐᖅ ᑭᓯᐊᓂ ᐃᑲᔪᖅᑕᐅᓗᓂ ᐊᒻᒪᓗ ᐃᑲᔪᖅᑎᒌᒡᓗᑎᒃ. ᐃᓄᐃᑦ ᓄᑕᖃᑦ ᐃᓕᓐᓂᐊᖅᑎᑕᐅᖏᓐᓇᓲᑦ ᐃᑲᔪᕈᓐᓇᕐᓂᐊᕐᒪᑕ ᐊᓯᒥᖕᓂᒃ ᐊᔪᕐᓇᓐᖏᑦᑎᓪᓗᒍ, ᓂᕆᐅᓐᖏᓪᓗᑎᒃ ᐊᑭᔭᐅᔪᒪᓐᖏᓪᓗᑎᒃ. ᐱᓕᕆᔾᔪᓯᖅ, ᐊᑑᑎᖃᖅᑐᖅ ᐃᑲᔪᖅᑎᒌᑦᑎᐊᕐᓂᖅ  ᐅᑎᓲᖅ ᐃᓱᒪᓇᕈᓐᓃᑎᓪᓗᒍ, ᑕᐃᒪᓗ ᖃᖓᐅᓕᖅᐸᑦ ᐃᑲᔪᖅᑕᐅᔭᕆᐊᖃᓕᕈᕕᑦ, ᑕᐃᑲᓂ ᐃᑲᔪᕈᒫᖅᑕᒋᑦᑕᐅᖅ. ᐃᑲᔪᖃᑎᒌᖃᑦᑕᕐᓂᖅ ᐅᓇᖅᑕᐅᖅ ᖃᓄᐃᖏᑦᑎᐊᕈᑕᐅᔪᖅ ᐊᒻᒪᓗ ᑲᔪᖏᖅᓴᐅᑎᑦᑎᐊᕙᒃ ᓄᓇᓕᖕᓄᑦ, ᐱᔭᕇᖅᓯᑦᑎᐊᕈᓐᓇᖅᑐᑎᑦ ᐃᑲᔪᖃᑦᑕᕈᕕᑦ ᐊᓯᖕᓂᒃ.  

ᐃᓚᖏᑦ ᐊᔾᔨᖑᐊᑦ ᑕᒪᑐᒧᖓ ᑐᑭᓕᐅᕈᑎᒋᓯᒪᔪᑦ ᑕᑯᑎᑦᑎᔪᑦ ᓴᓇᖃᑎᒌᒍᓐᓇᕐᓂᕐᒥᒃ. ᑕᐃᑲᓂ ᐱᖓᓱᑦ ᐊᔾᔨᒌᓐᖏᑦᑐᑦ ᐊᔾᔨᖑᐊᑦ ᓴᕿᔮᖅᑐᑦ ᓴᓇᔪᑦ ᐃᒡᓗᕕᒐᖅ (N-1979-051: 1885, N-1979-051: 1886, N-1979-051: 1888), ᐆᒃᑑᑎᒋᓪᓗᒍ, ᑕᑯᔪᒍᑦ ᑕᒪᕐᒥᒃ ᐊᖑᑎᑦ ᐃᑲᔪᖅᑎᒌᑦ ᓂᓚᖕᓂᒃ ᓇᖃᑎᕆᔪᑦ ᐊᒻᒪᓗ ᐊᒃᔭᖅᑐᐃᔪᑦ. ᐊᓯᖏᑦ ᐊᔾᔨᖑᐊᓂ ᑕᑯᑎᑦᑎᔪᑦ ᐊᖑᑎᑦ ᐊᒻᒪᓗ ᐊᕐᓇᐃᑦ ᐅᓂᐊᖅᑐᑦ ᓇᓄᕐᒥᒃ ᑖᓐᓇᓗ ᑐᖁᑕᐅᓵᑦᑎᐊᖅᑐᖅ (N-1979-051: 1994). ᐊᓯᖏᓐᓂ ᐊᔾᔨᖑᐊᓂ, ᐊᑑᑎᖃᕐᓂᖓ ᐃᑲᔪᖅᑎᒌᑦᑎᐊᕐᓂᖅ ᑐᑭᓯᓇᓐᖏᑦᑐᖅ ᑕᑯᓵᖅᖢᒋᑦ. ᑕᐃᒪᓐᓇᐅᒐᓗᐊᖅᑎᓪᓗᒍ, ᐱᔭᒃᓴᑦ ᓲᕐᓗ ᐸᕿᓂᖅ ᓄᑕᖃᓂᒃ, ᐃᓚᖕᓂᖅ ᓂᕐᔪᑎᓂᒃ, ᕿᓯᓕᕆᓂᖅ, ᐊᒻᒪᓗ ᒥᖅᓱᕐᓂᖅ ᐊᓐᓄᕌᒃᓴᓂᒃ (N-1979-051: 2078 ᐊᒻᒪᓗ N-1979-051: 2105) ᐅᑯᐊᑦᑕᐅᖅ ᐊᑕᑦᑎᐊᖅᑐᑦ ᑐᓐᖓᔾᔪᑖᓄᑦ ᐱᓕᕆᖃᑎᒌᑦᑎᐊᕐᓂᖅ/ᐃᑲᔪᖅᑎᒌᖕᓂᖅ.   

ᐃᓄᐃᑦ ᑐᑭᓯᐅᒪᔪᑦ ᐱᓕᕆᖃᑎᒋᒋᐊᖃᕐᓂᕐᒥᒃ ᓱᓇ ᐊᖏᔪᑦ ᐅᖁᒣᑐᑦ ᐱᓂᐊᖅᐸᑦ ᐊᒥᓱᓄᑦ ᑭᓯᐊᓂ ᐱᔭᐅᔪᓇᕐᒪᑦ ᐃᖕᒥᑯᕐᓄᓗᒃᖢᓂ ᐅᖁᒪᐃᓂᖅᓴᐅᕐᒪᑦ. ᑕᒪᔾᔭᐅᒐᓗᐊᖅᑎᓪᓗᒋᑦ ᐊᒥᓱᑦ ᐊᓯᕈᖅᑐᑦ ᐃᓄᐃᑦ ᓄᓇᖓᓂ ᑕᐃᒪᖓᓂᑦ ᐅᑯᐊ ᐊᔾᔨᖑᐊᖑᓚᐅᖅᓯᒪᖕᒪᑕ, ᑐᓐᖓᔾᔪᑎᖓ ᐱᓕᕆᖃᑎᒌᑦᑎᐊᕐᓂᖅ/ᐃᑲᔪᖅᑎᒌᖕᓂᖅ ᑲᔪᓯᔪᖅ ᐊᑑᑎᖃᖅᖢᓂ ᒫᓐᓇᐅᓕᖅᑐᖅ ᐃᓅᓯᑦᑎᓐᓂ ᐅᑉᓗᒥ ᓱᓕ.