ᐱᐅᓯᑐᖃᕆᔭᐅᓚᐅᖅᑐᑦ, ᐃᓄᐃᑦ ᓄᑕᖃᖏᑦ ᑲᔪᖏᖅᓴᔭᐅᕗᑦ ᑕᑯᑐᖃᑦᑕᕐᓗᑎᒃ ᐱᓕᕆᑎᓪᓗᒋᑦ ᐃᓐᓇᐃᑦ ᐊᒻᒪᓗ ᐃᓐᓇᑐᖃᐃᑦ ᐱᔭᕇᖅᓯᓗᑎᒃ ᐱᔭᒃᓴᒥᖕᓂᒃ ᑕᐃᒪᓐᓇ ᐃᓕᑦᑎᓂᐊᕐᒪᑕ. ᓄᑕᖃᑦ ᖃᐅᔨᒪᓕᖃᖅᑕᖅᑐᑦ ᖃᓄᖅ ᐱᔭᕆᐊᖃᕆᐊᒃᓴᖏᓐᓂᒃ ᖃᐅᔨᑎᑕᐅᓪᓗᑎᒃ, ᑕᐃᒪᓗ ᓇᖕᒥᓂᖅ ᐱᔭᕆᐅᖅᓴᓕᖅᖢᑎᒃ ᒥᑭᓐᓂᖅᓴᐅᓪᓗᒋᑦ, ᐅᕝᕙᓘᓐᓃᑦ ᑐᓂᔭᐅᖃᑦᑕᓚᐅᖅᑐᑦ ᐱᔭᒃᓴᓂᒃ ᐱᔭᕇᕐᓂᐊᕐᒪᑕ ᒥᑭᔫᑎᑦ ᐱᔭᒃᓴᐃᑦ ᐊᔪᕈᓐᓃᖅᐸᓪᓕᐊᑎᐊᕐᓂᐊᕐᒪᑕ ᑕᕝᕙᖓᑦ ᐃᓱᓕᓐᓂᖓᓄᑦ. ᓄᑕᖃᑦ ᑲᔪᖏᖅᓴᔭᐅᕙᓚᐅᖅᑐᑦ ᐃᓕᓐᓂᐊᕐᓗᑎᒃ ᐊᒻᒪᓗ ᐃᓕᑦᑎᓗᑎᒃ ᑕᒪᐃᓐᓂᒃ ᓈᓚᒍᓯᖅ, ᑕᐅᑎᒍᓯᖅ, ᐱᔭᕆᐅᖅᓴᕈᓯᖅ, ᐊᒻᒪᓗ ᑕᒪᐅᓐᓇ ᐱᓐᖏᐊᕐᓗᑎᒃ. ᐊᔪᕈᓐᓃᖅᓴᓗᑎᒃ, ᑕᐃᒪᓐᓇᑦᑕᐃᓐᓇᖅ ᐱᓕᕆᐊᕆᓗᒋᑦ, ᐊᒻᒪᓗ ᐱᔭᕇᖅᐸᓪᓕᐊᓗᑎᒃ ᑕᐃᒪᓗ ᒪᒃᑯᒃᑐᑦ ᐱᔭᕇᖅᓯᔪᓐᓇᓛᕐᒪᑕ, ᐊᒻᒪᓗ ᑕᒪᓐᓇ ᐃᓕᑕᑎᒃ ᐊᓯᒥᖕᓄᑦ ᐃᓕᑦᑎᔾᔪᑎᒋᓛᕐᒪᒍ, ᓴᓇᓕᕆᔪᓐᓇᕐᓂᖅ ᑭᓯᐊᓂᐅᔪᖅ ᐃᑲᔫᑎᒻᒪᕆᒃ ᐃᓚᒋᔭᐅᔪᓂ ᓄᓇᓕᖕᓂ. 

ᑕᑯᓐᓇᕈᖕᓂ ᐊᔾᔨᖑᐊᑦ ᑕᒪᑐᒧᖓ ᑐᑭᓕᐅᕆᓯᒪᔪᒧᑦ ᑕᑯᓂᐊᖅᑐᑦ ᐃᓛᓐᓂᒃᑯᑦ ᐃᓪᓚᐅᑦ ᐊᔾᔨᓕᐅᕆᖃᑦᑕᓚᐅᖅᑐᖅ ᓄᑕᖃᓂᒃ ᑕᐅᑐᒃᑐᓂᒃ ᐅᑯᑲᔪᒥᑦ ᐃᓕᓐᓂᐊᖅᑐᑦ ᐅᑯᐊᓗ ᓇᓗᓇᖏᑦᑐᑦ, ᓴᓇᔪᑦ ᑕᑯᑎᑦᑎᔪᑦ ᖃᓄᖅ ᐱᓚᒃᓯᓲᖑᓂᕐᒥᒃ ᐋᒃᑐᐃᓲᖑᓂᕐᒥᒃ ᐊᔾᔨᒌᓐᖏᑐᓂᒃ ᓂᕐᔪᑎᓂᒃ ᑕᐃᒪᓗ ᐊᑐᖅᑕᐅᓂᐊᕐᒪᑕ ᓂᕿᒋᔭᐅᓗᑎᒃ ᐊᒻᒪᓗ ᐊᓐᓄᕌᕆᔭᐅᓗᑎᒃ ᐊᓯᖏᑦ ᐊᔾᔨᖑᐊᑦ ᑕᒪᑐᒧᖓ ᑐᑭᓕᐅᖃᑕᐅᓯᒪᔪᑦ ᓄᑕᖃᑦ ᖁᖏᐊᖅᑐᖅ ᖃᓄᖅ ᐊᐱᒻᒥᒃ ᓇᑲᑎᕆᓲᖑᖕᒪᖔᑕ ᐃᒡᓗᕕᒐᒃᓴᒥᒃ (N-1979-051:1889), ᐱᔭᕆᐅᖅᓴᔪᑦ ᖃᓄᖅ ᐊᒫᓲᖑᖕᒪᖔᑕ (N-1979-051:1962), ᐊᒻᒪᓗ ᐃᓕᓐᓂᐊᓲᑦ ᖃᓄᑐᐃᓐᓇᖅ ᐊᑐᖅᓯᑎᑕᐅᓪᓗᑎᒃ. (N-1979-051: 2067, N-1979-051: 1963, N-1979-2090, N-1979-051-2094).

ᑖᒃᑯᐊ ᐊᔾᔨᖑᐊᑦ ᑕᑯᑎᑦᑎᔪᑦ ᓄᑕᖃᓂ ᐊᔪᖏᑦᑎᐊᕐᒪᑕ ᐊᒻᒪᓗ ᐃᑲᔪᕈᓐᓇᑦᑎᐊᕐᒪᑕ ᐃᓚᖏᔭᐅᓪᓗᑎᒃ ᓄᓇᓕᖕᓂ ᐊᒻᒪᓗ ᑕᑯᑎᑦᑎᔪᑦ ᐱᒻᒪᕆᐅᓂᖓᓂ ᐱᐅᓯᑐᖃᖏᓐᓂᒃ ᖃᐅᔨᑎᑕᐅᖃᑦᑕᕐᒥᓗᑎᒃ ᐊᑐᖅᑕᐅᔪ˙ᒫᖅᑐᓂᒃ. ᐱᓕᒻᒪᒃᓴᕐᓂᖅ ᐋᕿᒃᓱᐃᓂᑑᓐᖏᑦᑐᖅ ᖃᓄᖅ ᐊᔪᕈᓐᓃᕈᓐᓇᕐᓂᖏᓐᓂᒃ ᓄᑕᖃᑦ ᐱᔭᒃᓴᖏᓐᓂᒃ ᑐᓂᔭᐅᓪᓗᑎᒃ, ᑭᓯᐊᓂᑦᑕᐅᖅ ᑕᒪᒃᑯᐊ ᐱᓕᕆᔾᔪᓰᑦ ᐱᓯᒪᖃᓯᐅᑎᔪᑦ ᐱᒋᔭᐅᓂᕐᒥᒃ ᐊᒻᒪᓗ ᐃᓕᑦᑎᒪᔭᒥᒃ. ᑕᒪᕐᒥᒃ ᐱᐅᔪᑦ ᐃᑲᔫᑎᔪᑦ ᐃᓄᐃᑦ ᐅᒃᐱᕆᖏᑦ ᐊᔪᕈᓐᓃᕈᓐᓇᖅᑐᑦ ᐃᓐᓇᐅᓕᕈᑎᒃ.