ᐃᓅᖃᑎᒌᑦᓯᐊᕐᓂᖅ ᐱᓯᒪᓂᖃᖅᑐᖅ ᖃᓄᐃᖏᑦᑎᐊᕐᑎᑦᑎᓂᕐᒥᒃ ᓄᓇᓕᖕᓂ ᑕᒪᐅᓐᓇ ᐃᓅᖃᑎᒌᑦᑎᐊᕐᓂᐊᕐᒪᑕ ᐱᑦᑎᐊᖃᑦᑕᐅᑎᓗᑎᒃ ᐊᒻᒪᓗ ᐃᒃᐱᒍᓱᑦᑎᐊᕐᓗᑎᒃ ᐊᓯᒥᖕᓂᒃ. ᐃᓅᖃᑎᒌᑦᓯᐊᕐᓂᖅ ᐊᑕᔪᖅᑕᐅᖅ ᐊᓯᖏᓐᓄᑦ ᑐᑭᓕᐅᕕᑎᓄᑦ ᓲᕐᓗ ᐱᓕᕆᖃᑎᒌᑦᑎᐊᕐᓂᖅ/ᐃᑲᔪᖃᑎᒌᑦᑎᐊᕐᓂᖅ, ᑐᓐᖓᓇᕐᓂᖅ, ᐊᒻᒪᓗ ᐋᔩᖃᑎᒌᖕᓂᖅ, ᐅᑯᐊᓗ ᑲᔪᖏᖅᓴᐅᑎᑦ ᐃᓅᖃᑎᒌᑦᑎᐊᕐᓂᐊᕐᒪᑕ ᐊᑐᓂ ᐃᒻᒥᖕᓄᑦ. ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᑐᓐᖓᔾᔪᑕᐅᖏᓐᓇᖅᑐᑦ, ᐅᑯᐊᓗ ᐋᕿᒃᓲᑕᐅᔪᑦ ᐊᑕᐅᓯᐅᓂᕐᒥᒃ ᐊᒻᒪᓗ ᐊᑑᑎᖃᕐᓂᖏᓐᓂᒃ ᐊᓯᕗᑦ, ᑐᓐᖓᕕᖓ ᐃᓄᐃᑦ ᓄᓇᖃᑎᒌᒍᓯᖏᓐᓄᑦ ᐋᕿᒃᓯᒪᔾᔪᓯᖅ. ᑕᐃᑲᓂ ᑕᒪᐃᓐᓂᑦ ᐃᒃᐱᒋᖃᑎᒌᑦᑎᐊᕈᑎᒃ ᐊᒻᒪᓗ ᐸᕿᖃᑎᒌᑦᑎᐊᕐᓗᑎᒃ, ᐊᑐᖅᓯᒐᔭᖅᐳᖅ ᑕᐃᒪᓐᓇᐅᔭᕆᐊᖃᖅᑎᑕᐅᔪᓂᒃ ᐃᓅᑉ ᐱᔭᒃᓴᕆᓪᓗᒋᑦ, ᐋᕿᒃᓱᖅᓯᒪᔪᑦ ᑐᓐᖓᕕᒋᓪᓗᒋᑦ ᓄᓇᓖᑦ, ᐃᑲᔪᖅᑐᖅ ᐊᑐᖅᓯᓂᐊᕐᒪᑕ ᐃᑲᔪᖅᓯᖃᑎᒌᑦᑎᐊᕐᓗᑎᒃ ᐊᕙᑎᒥᖕᓂ. ᓄᓇᓖᑦ ᐃᑲᔪᖃᑎᒌᑦᑎᐊᕋᓱᐊᖅᐳᑦ (ᐱᓕᕆᖃᑎᒌᑦᑎᐊᕐᓂᖅ/ᐃᑲᔪᖃᑎᒌᖕᓂᖅ); ᐃᓄᐃᑦ ᐃᒃᐱᒍᓱᒃᓗᑎᒃ ᑐᓐᖓᓇᖅᑐᒥᒃ ᑐᓐᖓᓱᒃᑎᑕᐅᓂᕐᒥᒃ ᐊᒻᒪᓗ ᐃᓚᖏᔭᐅᔪᖅ ᐃᓚᖓᓄᑦ ᐊᖏᓂᖅᓴᒥᑦ ᐃᒻᒥᖕᓄᑦ (ᑐᓐᖓᓇᕐᓂᖅ); ᐊᒻᒪᓗ ᐃᑲᔪᕈᓐᓇᖅᑐᑦ ᐱᐅᓯᕚᓪᓕᖅᑎᓪᓗᒍ ᐊᒻᒪᓗ ᖃᓄᐃᖏᑦᑎᐊᖅᑎᓪᓗᒋᑦ ᓄᓇᓖᑦ ᑕᒪᕐᒥᒃ (ᐱᔨᑦᓯᕐᓂᖅ). ᑕᒪᕐᒥᒃ ᑖᒃᑯᐊ ᐸᕿᑦᑎᐊᕈᑦ ᐃᓅᓯᖃᑦᑎᐊᕐᓂᐊᕐᒪᑕ, ᑭᓯᐊᓂ ᐃᓄᒃ ᖃᓄᐃᖏᑦᑎᐊᖁᓪᓗᒍ ᐅᓄᖅᑐᓂᑦ ᑕᒪᐃᓐᓂᑦ ᓄᓇᓕᖕᓂᑦ ᐃᑲᔪᖅᑐᖅᑕᐅᓗᓂ.
ᑕᑯᓪᓗᒋᑦ ᐅᑯᐊ ᐊᔾᔨᖑᐊᑦ, ᑕᑯᓂᐊᖅᑐᑎᑦ ᖃᓂᒌᑦᑎᐊᖅᑐᑦ ᐃᓚᒌᑦᑎᐊᖅᑐᑦ ᐊᕙᑖᓂᑦ ᖃᑕᖑᑎᒌᑦ, ᐊᔾᔨᒌᓐᖏᑦᑐᑦ ᐃᓅᓯᖃᑎᒌᓐᖏᑦᑐᑦ, ᐊᒻᒪᓗ ᐱᖃᓐᓇᕇᑦ ᑕᐃᑲᓂ ᐊᐅᓚᑦᓯᕖᑦ, ᑕᑯᔪᓐᓇᖅᑐᑎᑦ ᐊᔾᔨᖑᐊᖅ N-1979-051: 1868 ᐃᓚᐃᔾᔭ ᐃᖅᖢᒃ, ᐸᓪ ᐅᓪᓚᑎᑕᖅ, ᑖᓂᐊᓕ, ᐊᒻᒪᓗ ᓛᓴᕆ ᐸᓂᓗᒃ. ᑕᐃᒪᓗ ᑕᒪᐃᓐᓄᑦ ᐃᓚᒌᒍᓯᑦ ᐊᑑᑎᖃᒻᒪᕆᓚᐅᖅᑐᑦ ᐊᓐᓂᕐᓇᓚᐅᖅᑐᑦ ᐃᓄᖕᓄᑦ, ᐃᓄᐃᑦ ᑲᑎᖓᔪᑦ ᐊᑕᐅᓯᐅᔪᑦ ᖃᑕᖑᑎᒌᑐᐊᑦ - ᐃᓄᐃᑦ ᐃᓚᑖᑲᓐᓂᖃᑦᑕᖅᓯᒪᕗᑦ - ᐅᓇ ᐱᒻᒪᕆᐅᓛᖅ. ᑕᑯᓪᓗᒍ ᐊᒥᓱᑦ ᐊᔾᔨᓕᐊᖏᑦ ᐃᓪᓚᐅᑦ, ᓄᓇᓖᑦ ᐋᕿᒃᓱᖅᓯᒪᔪᑦ ᐃᓚᒌᓐᖏᓇᐃᑦ. ᐃᓄᐃᑦ ᐱᐅᓯᖓ ᐱᒻᒪᕆᐅᔪᖅ ᑖᒃᑯᐊ ᓄᑕᖃᑦ ᐱᕈᕐᓂᐊᕐᒪᑕ ᖃᐅᔨᒪᓗᑎᒃ ᑭᒃᑯᓂᒃ ᐃᓇᖃᕐᒪᖔᕐᒥᓂ, ᑕᐅᕗᖓ ᐊᖑᑎᖃᑎᒥᖕᓄᑦ ᐊᒻᒪᓗ ᑭᖑᓕᖏᓐᓄᑦ. ᑕᒪᐅᓐᓇ ᖃᐅᔨᒪᓂᒃᑯᑦ, ᓄᑕᖃᑦ ᐃᓕᑦᑎᓯᒪᔪᑦ ᓇᑭᖔᖅᓯᒪᖕᒪᖔᑕ ᐊᒻᒪᓗ ᑭᒃᑰᖕᒪᖔᕐᒥᖕᓂᒃ. ᐃᓅᖃᑎᒌᑦᓯᐊᕐᓂᖅ ᐃᓕᓐᓂᐊᖅᑎᑦᑎᔾᔪᑕᐅᕙᒃᑐᖅ ᓄᑕᖃᓄᑦ ᓄᑕᕋᑯᓘᓂᖏᓐᓂᑦ ᑕᐃᒪᓗ ᐃᒃᐱᒍᓱᑦᑎᐊᕆᐊᖃᕐᒪᑕ ᐊᓯᒥᖕᓂᒃ, ᓈᓚᖃᑦᑕᕐᓗᑎᒃ ᐊᒻᒪᓗ ᐃᒃᐱᒍᓱᑦᑎᐊᕐᓗᑎᒃ ᐃᓐᓇᕐᓂᒃ, ᐱᓗᐊᖅᑐᒥᒃ ᐃᓐᓇᑐᖃᕐᓂᒃ, ᐅᑯᐊᓗ ᑎᒍᒥᐊᖅᑎᐅᖕᒪᑕ ᐃᒻᒥᓂᑦ ᖃᐅᔨᒪᓂᖅᓴᐅᖕᒪᑕ.
ᒪᓕᒃᖢᒋᑦ ᐃᓅᖃᑎᒌᑦᓯᐊᕐᓂᖅ, ᓵᓚᒋᖃᑦᑕᐅᑎᓇᓱᖃᑦᑕᕐᓂᖅ, ᐊᑭᕋᖅᑐᕐᓂᖅ ᐅᕝᕙᓘᓐᓃᑦ ᓯᖕᓇᓂᖅ ᐃᓅᓯᕐᒥᒃ ᓱᕋᐃᕗᖅ ᓈᒻᒪᓐᖏᑑᖕᒪᑕ ᐱᔾᔪᑎᒋᓪᓗᒍ ᐅᓗᕆᐊᖅᓵᕆᖕᒪᑕ ᐊᑑᑎᖃᕐᓂᒻᒪᕆᖓᓂᒃ ᓄᓇᓖᑦ. ᐃᓄᐃᑦ ᑲᔪᖏᑦᑎᐊᖅᑐᑦ ᐱᐅᔪᒥᒃ ᐊᒻᒪᓗ ᖁᕕᐊᓇᖅᑐᒥᒃ ᐃᓅᓯᖃᕐᓗᑎᒃ, ᐊᒻᒪᓗ ᐃᓚᖓᒍᑦ ᐃᓄᑦᑎᐊᕙᐅᔭᕆᐊᖃᓲᑦ. ᐱᔾᔪᑎᒋᓪᓗᒍ ᑖᓐᓇ ᑕᐃᒪᖓᓂᑦ ᑕᐃᒪᓐᓇᐅᔪᑐᖃᐅᖕᒪᑦ, ᐃᓄᐃᑦ ᐋᕿᒃᓯᓇᓱᑦᑎᐊᓲᑦ ᓈᒻᒪᓐᖏᓕᐅᕆᔪᓂᒃ ᐊᐃᕙᐅᑕᐅᔪᓂᒃ ᑕᒪᐅᓐᓇ ᓵᓚᒃᓴᕋᓱᖃᑎᒌᒃᖢᑎᒃ ᓲᕐᓗ ᑲᑕᔾᔭᕐᓂᒃᑯᑦ, ᐃᓄᐃᑦ ᐱᓐᖑᐊᕈᓯᖏᑦᑎᒍᑦ, ᐅᕝᕙᓘᓐᓃᑦ ᐃᓐᖏᖃᑎᒌᖕᓂᖅ. ᐅᑯᐊ ᑕᐃᒪᓐᓇᐅᔾᔪᓯᑦ ᐊᑐᖅᑕᐅᕙᒍᓃᖅᑐᑦ ᐋᕿᒃᓯᔾᔪᑕᐅᓲᖑᓚᐅᕐᒪᑕ ᓈᒻᒪᓐᖏᓕᐅᕈᑎᔪᓂᒃ, ᐃᓄᐃᑦ ᑲᔪᓯᔪᒥᒃ ᑲᔪᖏᖅᓴᐃᕗᑦ ᓴᓇᖃᑎᖃᕐᓗᑎᒃ ᑕᒪᐅᓐᓇ ᐊᖏᖃᑎᒌᓐᖏᓚᐅᖅᐸᒃᓗᑎᒃ ᑭᓯᐊᓂ ᐊᑭᕋᖅᑑᑎᒋᓕᓐᖏᓪᓗᒍ, ᐊᒻᒪᓗ ᒪᓕᑦᑎᐊᖃᑦᑕᕐᓗᒋᑦ ᐊᓯᑎᑦ ᐱᑦᑎᐊᕐᓗᒋᑦ ᐊᒻᒪᓗ ᐃᒃᐱᒋᑦᑎᐊᕐᓗᒋᑦ ᑕᐃᒫᒃᑕᐅᖅ ᐃᒃᐱᒋᔭᐅᑦᑎᐊᕈᒪᒐᔭᕋᕕᑦ ᐱᑦᑎᐊᖅᑕᐅᓗᑎᒃ.